Oté

Le lou la shanj an gardien mouton ?

Justin / 20 octobre 2012

Mi pans, konm moin, zot i koné in pé bann fab La Fontaine... kansréti inn-dé sak i aprann dann pti lékol. Na inn, zordi, i pass dann mon tèt, in pé tro souvan, sé la fab : "Le lou i dégiz ali an gardien mouton !". Pou kosa d’apré zot ? Pars, li romark la shas lé pa tro bon. Lo shien i suiv ali partou, gardien i ménaz pa li, mèm bann mouton i méfyé d’li. L’èr-la, li kalkil in kou épi li di : "Si mi dégiz amoin an gardien mouton, é bin, m’a nyabou mate in gob pou bann mouton-la é moin nora arienk la pène ranpli mon boujaron konm k’i fo. Ala li mète in po ronar dsi son do, li pran in gran baton konm sak bann bèrjé. Li lé sir son pyèz lé o-poin. Pou aranz ankor l’afèr li kalkil li sa émite in pé la voi lo gardien. Mank de po, in lou kan i irl la pa konm in bèrzé kan i koz… Demoun la débisk ali épi la foute ali in batlavé, franshman té pa pou zoué. Son boujaron la rèss vid, vid, vid…

Pou kosa mi parl sa ? Pars dabitid, mi koz la politik ? Bin, m’a dir azot moin lé pa byin loin. Pa loin ditou, sirtou kan mi pans lo Didier Robert. Bononm-la dopi li lé prézidan Konsèy réjyonal la pa arète kass lo dévlopman dirab. Èk son konpèr Sarkozy li la mète in boi dan la rou lénèrji solèr. Li la déklar li lé kont lénèrji volkan. Li la lès démont in tirbine l’avé mète pou fé l’ésé dan la mèr la-ba dann Sid. Aprésa, li la komans parl lotonomi dann lénèrzi solman an 2030, alé oir pou Paul Vergès 2020 lété in bon dat. Arzout èk sa li la kas lo tram-trin. Ni pé arète la pou lénèrzi... Dann lé zot domène, ni koné sak li la fé in viraj 180 dogré, pou finalman fé sanblan arpran bann projé Paul Vergès. Kansa li di la vérité, kansa li sharj dolo ? Kansa li lé dann lo vré, kansa li lé dann lo fo ? Pou moin, li lé partizan lo dévlopman dirab, konm mon gran-mèr la fé lo gran rèd.

I paré in n’afèr. Sa dmoun Sin-Pol i di é moin mi vann konm moin l’ashté. Lo didier Robert i vé kapar la méri Sin-Pol é pou sa, li vé kontourn madam Bello é konm lo madam lé kont dévlopman dirab, li domann si i fo pa li lé pour. Aprésa li pilone la piblisité é momandoné li fé sote lo madam. Ki vivra véra, mé pou l’moman, sanm pou moin, li lé riskab ète konm lo lou kan li shanj ali an gardien mouton é mi pé dir azot : Sa lé riské !

 

Justin


Kanalreunion.com