Oté

Lé maléré viéyir !

Justin / 31 out 2010

Viéyir, sa in n’afèr normal. Ni pé pa s’an-pass de sa. Mé kan ou la travay toute in vi, é kan ou la fé travay dir, ou i éspèr o-moins la rotrète va évite aou problèm larzan. Lé déza dir d’avoir aral out gogonn soufrans toute in vi ; lé ankor pli dir artrouv aou dann lokisité déssi out vyé zour. Pli pir ksa, artrouv aou dan la mizèr noir.
Saint-André, dimansh matin, in madam, déza byin rézonab, la pran son kouraz pou vnir ziska lo mikro pou rakonte son ka. In ka pa roz, mi pé dir azot ! Son mari té zournalyé agrikol, li la trimé par dsi trimé toultan ké li la gagné. Èl ossi la fé parèy son koté. Kan tou lé dé té i ran pi, zot la domann zot salaryé san konète kossa té i atann azot. Zot té i atann pa, zot dé, toush in pti guiguine la rotrète konmsa… mèm pa troi san éro, lé dé ansanm. Si tèlman k’èl i di avèk son gramoun, si zot l’avé ankor in pé la santé, si zot l’avé ankor in pé la fors, zot nora arshèrch in pti boulo pou ariv a zoinn lé dé boute par l’milyé, pou zot mèm, épi pou ède in pti myète zot zanfan. Mé la fors na pi ! Zis assé pou trinn son kor ! Zis assé pou viv solman, pou fé sak la vi i rann obligatoir pou fé… bann zèss ésansyèl pou in moun vivan.
Poitan, zot la fine antann gouvèrnman promèt li sava goumante in pé lo minimom rotrète, pans in pé bann moun la fé travay dir ; Zot la antandi, mé zot la pa konstate aryin. Bate la lang, sa lé fasil, réspèk son promèss, sa lé byin pli dir. Dann kondityon konmsa, lé maléré viéyir !

 Justin 


Kanalreunion.com