Oté

Lé pa tro tar, mé aspèr pa tro kan mèm !

Justin / 10 désanm 2009

Matante Zélida la ékrir Justin :
Mon shèr nové, mon spès salté ! Kossa l’ariv azot avèk l’éshofmann klima ? Apré an avoir vouli ranplas gouvèrnman — konm moin la di lotrozour ! —, ala k’bann rouj-de-fon i vé ranplas lo ségnèr kréatèr é mèt de tout shoz… ala k’zot lé okipé pou tras in plan pou déshof lo klima ! Aryink sa Baya ! Nana d’moun na poin aryin pou fèr déssi la tèr-la ! Akoz zot i okipe pa in pé z’ot madam, z’ot zanfan, donn in pé manzé z’ot shyin lo do lé flanké vèy pa ? Kansa, mon dyé, kansa v’ariv fèrm in kou také bann moun insignifyan konmsa ? Tok ! Pran sa pou toi !

Justin la fé pou répons :
Mon vyé matante k’i koz toujour la boush rouvèr… pèrsone la pa di aou ni vé ranplas gouvèrnman konm ranplas Bondyé. Pèrsone ! Mé ou la pa antann lo klima l’apré déréglé, bann glasyé l’apré fondé, la mèr i monte pli-o, plantasyon i sèk, sansa i noiye. Bin ! Sa la fote kissa ? La fote Bondyé ? Non matante, sa la fote demoun, pars sé demoun k’i polyé l’èr afors fane la fimé sharbon, sansa pétrol. Figuir aou… bann péi tro plate lé riskab disparète avèk la mèr k’i monte. Sa lé pa inn krak sa matante. Sa sé bann gran savan la amontré. Rozman, i di lé pa tro tar, mé aspèr pa tro kan mèm !

Justin


Kanalreunion.com