Oté

Lé pli fasil fèrm lo zyé, tak la lang, boush zorèy ké arkonète la vérité !

Justin / 29 avril 2011

Gouvèrnman i sort siprime lo médiatèr la Répiblik, la HALDE, épi défandèr lo droi bann zanfan pou argroup sa dann in "défandèr bann droi". Pou kossa d’apré zot ? Pou bann droite, sé pou fé in sèl avèk lé troi... konmsa va dépans moin. In pé i di plito, sar pou mète in kroi déssi lé troi épi anpèsh fé zot mission konm k’i fo.
I fo dir, désèrtin foi, zorèy in pé daoir té i sif afors ète kritiké, pou an avoir bafoué lo droi bann moun, a komansé par sète bann zanfan andikapé, sète bann travayèr étranzé, bann migran parké konm zanimo, sansa bann z’izazé malkontan avèk l’administrasion. I paré, in pé lé fatigué antann bann kritikasion. Alors, pou ranplas lé troi, sak nou la vi an-o la, la mète anlèr in spès mashin konm lo zénéral De Gaulle nora di. In spès mashin obéisan, bien réspéktyé lo droi bann dominèr… a komansé par l’Etat li mèm ;
Pars si i rogard bien, i siprime bann z’afèr-la, l’èr Sarkozy i sèy arpran favèr dann l’opignon, sirtou arpran Fron nasional son bann z’éléktèr. Mi vé pa done konsèy lo pti prézidan, mèm si mi rapèl ali solman lo kozman in gran bonome, si mi tronp pa té i apèl Karl Marx, té i di konmsa : « l’istoir, sa i répète pa, sa i bégèy ! ». Alors, si Sarko i vé rofé l’ané 2012 sak li la fé l’ané 2007, lé for possib son ane i pass pou sak li lé, donk pou inn bourik.
Siprime défansèr lo droi bann zanfan i vé pa dir lo droi bann zanfan lé réspékté. Siprime la HALDE i vé pa dir na pi bann diskriminasion. Siprime lo médiatèr la Répiblik i vé pa dir l’administrasion i sava réspèk lo droi bann z’izazé. Lé pli fasil fèrm lo zyé, tak la lang, boush zorèy ké arkonète la vérité.

Justin


Kanalreunion.com