Oté

Lé pli fasil naz dann sans lo kouran, plito ké armonte dann kont-kouran !

Justin / 3 mé 2010

Kan bann saj l’Afrik i di, si ou i vé konète ousa ou i sava, obli pa agard ousa ou i sorte. Sa lé byin vré ! Solman i fo ou i rogarde pou vréman é ou i tir lo désizyon k’i fo pou amène aou dann bon shemin. Pars mal rogardé sé mète aou dann in trin,ou lé pa sir, v’amène aou o-bi.

Akoz mi di sa ? Akoz na in tan, nout parti l’avé pi okin roprézantan... in tan li l’avé poin moiyin loué in sal pou li fé in rényon... in tan ankor ousa bann kominist té i gingn mèm pa in bours pou fé zétide, in karo pou li vann son bazar, in larzan déga siklone. Sak i kroi pa sa, domann bann z’ansyin va ésplik azot.

Poitan nout parti la viv, la ardrèss la tète é zordi koman-koman li lé kapab ranporte déssèrtènn viktoir. Mé, sa i vé pa dir, nou la réspèk san-pour-san la loi moin la di an-o la... Kan la gosh la pran pouvoir, nou la pans lété bon pou nou é nou té fine arivé. Alé oir té pa vré… L’èr-la nou la di, i trap ar pa nou in n’ote kou ! Kan Paul Vergès la gingn prézidans la réjyon, nou la pans ankor nou lété an-lèr. Nou n’avé l’idé nou lété an lèr… alé oir nou lété pa si anlèr ké sa. Alor ni di, i trap arpa nou ankor in kou ! Souète lé vré, souète ni obli pa ousa ni sorte pou trouv lo shomin nout fitir. Mé antansyon ! Lé pli fasil naz dann sans lo kouran plito ké armonte kont lo kouran.

Justin


Kanalreunion.com