Oté

Lé tar, lé tré tar mé lé pa tro tar !

Justin / 9 avril 2015

Si ni baz si zournal dérnié tan, fin di mwa nou néna in vizit. Dopi dé trwa zour zournal i anonss in bon nouvèl pou nou fin di mwa, débi mwa proshin konm sa, a zot i konsidèr sa konm in bon nouvèl. I prétan misié lo promié minis i vyin konmsa pou rann a nou visit, poitan mi krwa pa si ni dwa mank a li bokou. Néna i di li vyin pou romont révèy son bann la gingn in rinsé dann zéléksyon, pétèt li vyin pou drèss lo bor èk banna pou vréman. Li vyin ran a nou vizit, fo pa nou sanplingn a nou.

Rapèl anou solman 2012, zéléksyon prézidan, in kou d’pat prézidan Hollande lé éli èk 72 pour san, konm i di néna pou zoué d’dan. Aprésa, ansanm-avèk, dan lélan, in pé san konprégnir osi nou la mèt nout déstin dan la min 5 dépité sosialis. Lé minm dépité la gingn galo lot dimansh. Néna solman trwa zan. Kosa i rèt a nou zordi dé tousala ? Nout péi i viv mié pou otan ? Romark la ba déor lé pa mié, la ba déor zistoman banna i di lo promié minis i donn tout larzan lantropriz, na pwin ryin pou travayèr.

Kantanou, ni profit misié lo promié minis, ni profit ou vyin pou poz a ou inn dé késtyon. Pa bozwin kado, ni vé pa, ni vé zis sak i rovyin a nou. Kosa i rovyin a nou ? Lo prézidan i koné li.I rèt a ou avan v’ni alé domann lo prézidan la lis promèss li la fé a nou lo promié avil 2012 la ba sin lui. Sanm pou mwin la lis lé long. Nou la tonm dakor si lo program sépousa nou la vot an touk pou li. Lé lèr rann a nou kont zordi. Konm di nout kamarad Paul, lé tar, lé tré tar mé lé pa tro tar.


Kanalreunion.com