Oté

Lé vré, i pé pa z’ète bon partou !

Justin / 26 avril 2011

Rényon-Promyèr la intéroz madam la pézidant l’IRT dimansh Pak. Lo zournalis la poz ali in késtyon déssi lo zistoir bann viza pou tourist i sort l’Inn sansa la Chine. Madam la prézidant la réponn, la pankor fé, mé èl nana in bon léspoir. Éspéron èl na rézon ! Éspéron !

Mé si mi tronp pa, son lékip lé pli for pou alé la-ba dann l’Ostrali é an partikilyé dann l’Adélaïde ké alé dann l’Inn ou sansa la Chine. Sa moin la pa invanté, é tout demoun la bien vi dann zournal sansa dann télé. Moris ossi i intérèss azot, é Promyé minis morisien la fine kalkil azot pou sak zot i lé, konm in bann manzèr d’soup, pars sa i anpèsh pa li zok La Rényon shak foi li gingn. Sa ossi demoun la fine antann épi oir dann télé. Mi éspèr la line dé myèl fini pa an line dé fyèl. Anfin, ki vivra véra !

Mi koné pa si madam la prézidant té i vé dir dann son kozman, La Rényon té i sava rant dann l’éspas Shengen, pars si sé sa, nou lé mal parti. Pars si mi tronp pa, la mèm lo ba i blèss. Mé mi trouv sa in pé bizar, é pou moin, lo l’èr lé pa bien shoizi, pars demoun lé in pé informé la fine bien antann gouvèrnman fransé i vé kass so zakor-la. Li na la krintiv sa lé riskab fé pèrd ali zéléksyon l’ané proshèn, an anpèshan ali siflète lo voi lo Fron nasyonal.

Konm koi lé possib ète in bon shantèz san z’ète in bon politik ; Lé vré, i pé pa z’ète bon partou !

Justin


Kanalreunion.com