Oté

Lé zot i fé kour a nou déryèr la tèt la mori !

Témoignages.re / 5 novanm 2015

Sanm pou mwin lèr larivé pou fé la riptir pou vréman èk so sistinm vant an lèr, so sistinm finn drwa konm i di. Lo sistinm la finn tonm féblès, minm si tanzantan i donn inn ti pé lo pou pa mor, si ni sanz pa, na bat dann mir, roul konm ni vé nout kanar lé nwar. Kiswa ni sanfoudsa, donkalor ni kontinié donn filaz shomaz, ni parl pi lo nivo d’vi domoun, ni lès do fé pran dan la kaz boudikont. Kiswa ni pran in ka èk nou minm pou koup èk so vilin labitid.

Zéléksyon rézyonal mwa désanm sé pétèt lo moman pou tourn lo do èk bann parti i pran touzour lord èk Pari, sépousa la nouvoté sé nou, linion PCR-Progré, pou nout Rényon nouvèl, boudikont pou in nouvèl politik. Sak i di Pari i komann pa nou, i pran lé minm é i rokomans, kont pa d’si zot pou fé la riptir. Mi akout in pé bann kandida, mi argard in pé kisa i vé la riptir èk lo sistinm, kisa i vé pa.

Pou lèr lé in pé difisil vik na pwin inn néna vréman in bon program, na pwin inn néna in bon prozé. In kamarad la di a mwin konm sa, Poukoué zot va krèz la tèt vik zot i pé proférabloman pran dan nout ta. Zordi mi koz èk in boug, li di a mwin konm sa, mwin lé pa kominis, mé mi dwa rokonèt ké lo sèl parti, néna pou réponn zordi, lo sèl pou vréman néna pou manié, sé lo parti kominis. Lé zot i fé kour a nou déryèr la tèt la mori !


Kanalreunion.com