Oté

Lékonomi La Rényon an résésyon
La kriz, lo do lé larj !

Justin / 9 juillet 2011

Défoi demoun i di : « Le shif i manti pa ». Sof si ou i trafik ali, mé dann so ka-la, tardra viendra, ou i fini par bite dési la vérité, é konm di Kréol, la vérité na in sèl koulèr. Dopi in an, i antan la Réjyon, i antann l’Etat débite zot sornète. Donkalor, moin lé sir in bonpé d’moun té i kroi l’anbéli té i ariv pli d’van. Apré la plui, solèy té i sar dékashète son tète déyèr bann niyaz.

Biensir, kan ou i siprime bann gran projé lé paré pou démaré konm tram-trin, konm la MCUR, la rout litoral, la rocade Tampon. Arzout èk sa kan d’ote i fé parèy, konm la komine Sin-Dni avèk lo Pol oséan, lo Zénith, sansa d’ote projé ankor. Konm toulmoun i koné lo rol bann gran shantyé i zoué dann nout lékonomi, lé shoz té i pé pa bien marshé. Oparavan, lékonomi La Rényon l’avé in kroisans té i dépass in pé sète sak désèrtin i apèl "la métropol". L’anploi té i suiv in pé é demoun té i di, solon moin a-tor, lo péi té tiré d’afèr. A-tor, pars bann shif na la tète dir, é la kroisans lékonomi té i trap pa la goumantasyon la popilasyon. Mé nou va rovni la-dsi, pars in pé i di, si, konm siklis, nout lékonomi i pran pa in braké pli gran, la défète lé o-bout shemin. Moin pèrsonèl, mi pans zot na rézon !

Biensir, i pé di sé akoz la kriz. Mé dépi, in bon koup de tan, nou lé dan la kriz. Konm bann moun i koz bien, i di : sé in tandans lourd. L’ané 2010, nou la trap la résésyon. La résésyon sé kan bann rishès i fé dann le péi i diminyé olèrk goumanté. Lo rézon, ni koné bien, mé ni pé fé in sipozisyon : si gouvèrnman l’avé pa raz anou la pint, si in bann désidèr k’i oi pa pli loin ké lo bout zot né l’avé pa fé konm moin la di anlèr-la, ni pé di, é sa lé sir, La Rényon noré pa plonj dan la résésyon ; Fransh vérité ! Epi, la sityasion l’anploi noré pa été katastrofik konm sak ni koné. La kriz, lo do lé larj.

Justin


Kanalreunion.com