Oté

Léksprésyon démokratik : tout sitoyin mèm trètman

Justin / 5 octob 2013

Mi sort in biro d’vot paran dann kolèz èk ékol.
Moin té fine rakont koman, si linformasyon po in rényon i pas ryink su lo sit internèt, na paran va zamé konèt !!!
La Rényon, 50% la popilasyon i koné pa lir.
Lo réktora i donn bann diréktèr(ris) zinstriksyon po bann paran voté ; kan it mèt sa dann zanvlop, ti poz la késtyon « ki sa i sar lir tou sa la ? ». Po sak i koné lir, lé déza pa ankourazan. Mèt an gro lèt, pli fasil ; mé ladministrasyon i pé osi aranz sa din manyèr lo paran i konpran toudsuit —mèm son marmay i pé èd a li.
Là moin na in ka, si in fèy A4 (grandèr masine a ékrir). In dirèktèr la mèt lo tèks an 10 foi. Kalkil kan ti pran ton sizo po koupé, grandèr papié ti ginye, dizon la grandèr 4 tèm réini. Si ou la poin linèt ou in loup po lir, ésèy pa. Déza lo tèks lé pa angazan, ouar ékri a li tèlman fin, apros pré la limyèr for, karkiy out zié.
Trouv drol si paran — èk tout bann zilétré néna — i tronp.
Koué i kout mèt : Paran : nom, prénom, adrès, zanfan, klas, signatir… montr a li ou sak li doi ranplir sa si lanvlop, lo marmay, li ginye ékspliké : « papa, monmon, sign là ! ».
Trouv drol si nora biltin nil, panasé, zanvlop pa ranpli, pa signé ?
Fitin tan, mèm biltin navé poin mèm koulèr. Po zéléktèr analfabèt, i rokoné son kandida par la koulèr son biltin : Verzès in koulèr, Débré in ot koulèr, konm sa lé klèr. Nout tout sitoyin, ni doi bien konprann parey, koué ni sar fé, sinon ta koul ti poul oua sort ti kanar.
Léksprésyon démokratik, tout sitoyin mèm trètman.

 Justin  


Kanalreunion.com