Oté

Lénèrji sé la klé pou nout dévlopman !
Lénèrji dirab, sa in klé k’i ansèv toultan !

Justin / 2 avril 2011

Mi koné pa si zot lé konm moin. Mi koné pa si nou nana mèm l’opignon déssi la politik Sarkozy dann ka lo dévlopman dirab. Konm dann tout konpartiman son politik, mi pé dir li di in n’afèr é mi koné pa koman li fé, mé li fé lo kontrèr. Dann toute sèktèr lé konmsa. Lé konmsa galman dann dévlopman dirab. Lo plan Grenel inn, l’avé z’afèr intérésan dédan. Grénèl dé, sé kaziman in bob ! In viraz san katrovin dégré par raport lo dévlopman dirab. Grenel dé, i bate grenèl in atèr, san konplèks.

Si mi di azot lo plan pou l’otonomi dann lénèrji ? Sa lété in gran léspoir pou nou. Mi pans zot i pé ète dakor avèk moin. Sarkozy ossi, la di li té dakor avèk sa. Sé sak li la di, mé la pa anpèsh ali dévir son dol. La pa anpèsh l’UMP dévir lo do avèk so projé-la. Koman nou té i doi trap l’otonomi dann lénèrji ? Par lénèrji solèr, lénèrji lo van, la mèr, la jéotèrmi épi la biomass. Arzoute èk sa lénèrji d’lo, sak nou la pankor tilizé. Sarkozy la komans par fé in prozé "Gerri", li la pass ballon Didier Robert, konmsa li té sir lo boug nora tyé lo projé san inkyète ali plis ké sa.

Zot i ansouvien sak Lénine téi di déssi lénèrzi ? Li té i di konmsa : "Sosyalism, sé léstrésité plis lé soviet !". San alé ziské la, ni pé dir :"Lénèrji , mon bann dalon, sa in klé pou lo dévlopman. Lénèrji ronouvlab, sa in klé i ansèrv toultan !". Lénèrji renouvlab, sa lé bon pou nou, pars sa i polyé pa l’èr é pars sa i pé pèrmète anou produi saknou la bézoin produi, konsome sak nou la bézoin konsomé ! Sa la pa pou in zour, sa sé pou touzour, pou sort dann l’éta ké ni lé, é pou alé dann shomin nout dévlopman.

 Justin 


Kanalreunion.com