Oté

Lénèrzi tèrmik la mèr : Té i falé vèy sa konm lé dsi l’fé, plito ké gingn tatane dann son koin

Justin / 3 désanm 2010

Mi pans zot i koné kosa i lé lénèrzi tèrmik la mèr (ETM). Mi pans zot i koné sa in téknik pou tiliz la diférans tanpératir rant lo fon loséan épi la sirfas pou fé léstrésité. Lo téknik lé pankor byin paré, mé si i nyabou fé sa, sar in bon ranfor pou nou trap l’otonomi énèrzétik.

L’EDF i rodré pa zoué anou in pate d’koshon ?
Dépi dé z’an, la fine mète an route in l’aparèy pou fé l’éspéryans koté Sin-Pyèr é i kalkil mèm fé in lizine éspérimantal par-la l’ané 2015 par-la koté Le Por. Sar in bon plan pou nou ! Mé, i prétan dir, na konm in mové nouvèl lé riskab arivé... i parétré l’EDF lé pi tro dakor pou sa, é mèm La Martinik na konm l’intansyon kapar projé-la pou li. Pou toute sort rézon, mé sirtou pars li la déside fé in l’izine éléktrik sal dann Port, é l’otonomi énèrzétik, sanm pou moin, sa i bote pa li bokou.

La Réjyon noré konm gingn somèy ?
Arzoute èk sa, a s’ki paré, la Réjyon lé pi tro la èk sa. El noré mèm gingn somèy dann projé-la. Pli vif, pli trète, La Martinik lé riskab koup dovan nou. Pars pou méssyé Didier, lé pli fasil bate karé Adélaïde, abandone lo tram-train, tir in tré déssi la zéo-thèrmie... fé lo pan dann télé, fé mète son foto karante-é-in foi dann zournal la Réjyon ké défann z’intéré La Rényon konm k’i fodré.

Kosa v’arivé éstèr ? Ni koné pa. Va kontinyé lo prozé ETM La Rényon, sansa i kontinyé arpa ? L’Érop va done larzan pou dé prozé parèy, sansa pou inn solman ? Si i done pou inn, pou lékèl ? Touléka, si ni fé roul anou ankor in kou dan la farine, nora pa bézoin rode lontan lo résponsab... Konm di kréol, in bon n’afèr konmsa, té i falé vèy sa konm lé dsi l’fé, plito ké gingn tatane* dann son koin.

*gingn tatane = gingn somèy

Justin


Kanalreunion.com