Oté

Lénèzi ? Rant dé solisyon, i fo shoizi sak lé prop kant mèm !

Justin / 27 zwin 2013

Dann Karaïb nana in pti péi i apèl Sin-Martin. Sa lé pa gran, dizon lé konm in komine. Dann tan d’avan li té i fé parti la Guadloup, é dopi i sèrtin tan li nana konm ki diré son lotonomi par rapor la Gouadloup. Sa sé in n’afèr laktyalité la pa bate tanbour dsi, mé la pa sa mi vé dir. Mi vé parl lénèrzi, donk léstrésité pou pti péi-la.

Laba, na in lizine éléktrik i marsh avèk gazoil. Sa i égzis dopi in bon koup de tan, mé koméla, lo péi la bézoin plis kouran é li dévir ali par koté l’EDF. L’EDF i ar dévir dsi Bouygues épi sète la i propoz in nouvo lizine tèrmik i fonksyone avèk gazoil. L’afèr lé près fé, vi k’nana in domann pèrmi konstruir : sa va pran sis moi, épi pou fé lo zafèr, va mète dé zané. 

Bon nouvèl, mové nouvèl ? Pétète bon nouvèl pou linstan pars bann moun i abit dann péi la gingn kouran san tradé. Mé sar pa lénèrzi prop é sé la ke lé in mové nouvèl. Konm pou nou dan la bé La Posésion : l’EDF la déside fé in lizine tèrmik avèk lénèrzi fosil plito ké roshèrch in bon solisyon pou dévlop lénèrzi prop.

Mi poz amoin in késtyon : Sin-Martin, sa in péi fransé. Gouvèrnman fransé lé, d’apré sak li di, dakor pou lité kont l’éshofman klimatik, li sré plito pour lénèrzi prop — sof so salté d’lénèrzi nikléèr ! — bin akoz li fé pa in loi pou favoriz vréman lénèrzi prop ? Akoz li obliz pa l’EDF, son prop lantropriz, shoizi rant dé solisyon sak lé prop. Si li vé, li pé ! Si l’Erop i vé, li pé galman !

 Justin 


Kanalreunion.com