Oté

Lèr la, domoun navé pwin ankor kouran èk dolo !!

Justin / 14 zanvié 2016

Zour dozordi néna ankor in takon d’moun vivan, la koni la koloni, a nou minm nou la pa tro koni vik nou lé éné aprésa, mé minm si nou lé éné apré, sanm pou mwin nou la gingn in bonn ti restan vik aprésa la tourn konm papiyon la lanp, la pran lo tan. Souvan-dé-fwa, minm ankor zordi désertin sitiasyion i pé rapèl a nou la koloni. Poitan ni pé di tousala i armont lwin, néna in vié laz. Tanto ni fèt lo 70 z-an la lwa départmantalizasyon. Koué lété la Rényon dann la koloni ?

Fo di, nou té i sort dan la guèr, déza navé pwin la kaz tank sa, é kan lavé in bout, té in kaz an pay, konm in boukan. Dan la kaz lavé la tèr bati, ziska tar navé la tèr bati dan la kaz, sépousa mi di nou la gingn inn ti restan. Dan la kaz, lo mèb té rar, kont pa tro d’si, lo pié lo li té antéré èk in gouni dosi. Banna té apèl lo li-kit-la ousinonsa lo li - kour-pa. Byin sir, lavé pwin kouran. Lavé pwin d’lo dan la kour, té falé sharoy dolo a kout fer blan, marmay lavé shakinn son fér blan vik lété zot lokipasyon.

Doktèr lavé pwin, si lavé inn, li té i rèt lwin, lo tan li ariv domoun navé lo tan mor, sirtou maladi té i mank pa, navé lo pali, la tiberkiloz, la lèp… Loto lavé pwin, déza lavé pwin shomin. Lékol la Rényon lavé inn rant-rant, aryink zanfan bann gro lavé drwa lékol. Sépousa osi nou néna ankor zordi in gro to d’zilétré. Lé vré minm si nou lé pa éné dan la koloni, nou la gingn inn bon restan. Pou prèv, zané 70, lèr la, désertin zandrwa, domoun navé pwin ankor kouran èk dolo dan la kour !


Kanalreunion.com