Oté

Lèsh bote blouz ! I fé lo lèsh bote blouz !

Justin / 18 novanm 2010

Mi èm byin bann gran zournal, mi èm byin bann télé épi ossi bann gran radyo. Pou kossa ? Pars kan in nouvèl i intérèss aou, la pa sir banna va anparlé, sansa si i anparl, pa sir ou i antann la vré vérité. Akoz sa ? Mi pans pars dann fon zot kèr zot lé pou moun byin. Moun byin ? Oui, pou d’moun la droite. Banna lé frékantab, é an plis i fo ménaz banna. Zot na lo pouvoir, zot na larzan é zot i pèy la piblisité. Sa lé séryé sa !

É la déontolozi alors !
Dépi Sarkozy la gingn zéléksyon prézidan li lé dann média. Si pa l’matin, lo soir. Si la pa lo soir, lo matin. Li sar kozé i anparl. Li koz, i pass ali an dirèk si possib. Li la fine kozé, i komante. In zour i di li rovyin déssi l’dovann la sène... in dovan li la zamé kité. La grèv lé pa inportan di pou kossa. Sak i fo sé an avoir in zyé déssi lo nonm manifèstan pou dir la mobilizasyon i dékline. Forséman in zour i fini par ète vré. Si gouvèrnman i done in poinn vizé, i fo pa alé rode si lé vré, i fo bate tanbour konmsa i rant dann zorèy demoun. I prétan dir sa i apèl la déontolozi !

Po la rényon lé plis vré ankor !
In l’éshèk i transform an siksé. La prèv ? La rouv la route tamarin pou vélo, patin roulant, sansa moun a pyé. La foiré ! Bin alor, landomin i di l’avé kat mil vélo si l’route. Konte lo nonm la rou, diviz par dé é i gingn lokont ; Adélaïde, lékipé la foiré ossi. Mèm La Rényon la pèrde l’èr la-ba. In siksé, mi di azot, in siksé ! Touzis si in pti zournal 740.000 pèrsone i ashète la trouv moiyin margogné-margogné. A par k’sa lo z’afèr la roul ron !

Si domin bann roz bonbon i pran pouvoir ?
L’èr-la, in sèl règ konduit : l’obzéktivité. La droite nora son par, bann roz bonbon nora zot par. Pa bann rouz-de-fon. Zot lé foute mèm pa rokonésans. Épi, zot i gonf pa lo pla bann propriétèr zournal. An atandan, konm lo shantèr di :"lèsh bote blouz ! I fé lo lèsh bote blouz !"*

 Justin 

* Eddy Mitchell i shante sa !


Kanalreunion.com