Oté

Lèsh bote blouz ! mi fé lo lèsh bote blouz !

Justin / 12 novembre 2014

Matant Zélida la ékrir Justin :
Mon shèr nové, mon spès salté, rouj-de-fon dovan l’éternité, m’a dir aou, pou moin, na poin in pli gran prézidann réjyon ké mésyé Didier. Pou kosa mi di sa ? Pars li koné ousa li sava é asiréman li sava loin. Pars li koné ousa li sava é pèrsone i gingn pa fé shanj ali d’shomin … La prèv ? La prèv par bann médya. I anparl dé li toultan : sak i pé i done ali la parol, sak i pé i manyé son l’imaj san kashé, san éstropyé, san déformé. Bann aboiyèr, i aboye mé zot aboiyman i ansèrv de riyin. Donk, vi ké bann médya, i difiz in bon l’imaj dé li sé pars sa i mérite ali. In poin sé tout ! Tok ! Pran sa pou toi !

Justin la fé pou répons :
Mon vyé matant k’i koz touzour la boush rouvèr, mi trouv sak ou i di lé ziska danjérab. Alor, si bann journalis i difiz in bon z’imaz mésyé Didier, sé pars ké li vo bien. Mi domann amoin si na poin in n’ot kalité linterprétasyon !
Dizon, par ébzanp-mi di pa lé vré, mé mi fé konmsi !- donk, dizon, si lo dé gran zournal, zot finans i pèrmète pa zot krash dsi larzan zot i gingn avèk la réjyon donk lé posib zot i bros mésyé Didier dann sans lo poil plito ké dann sans kontrèr ! Parèy si lo bann télé, la bézoin la mane i tonm dopi lo piramid kapoté, zot i sar pa bros mésyé Didier dann lo kontropoil pars li pé manyé kont zot la roprésyon, é si i donn pi azot lo pourkoi -Kosa va éspasé ?.
Sa sé in fasonn oir lé shoz mé i pé an avoir in n’ot. Par ébzanp lo mésyé lé kapab fé prann bann journalis po d’shanm pou pla kouvèr. Pou kosa mi di sa ? Pars si bann journalis la droit lé kapab oir klèr par zot mèm, si zot té kapab trouv in shomin pou nout péi avansé..na lontan nou nora koni sa, é sak ni lir par zot plime i éklèr pa nout lantèrn… A moins ké lo pti solda i apèl Didier lé kapab may la stratézi avèk lo tik-tak, épi anploy bann riz li la aprann dann l’armé.
San alé rodé ziské la, ni pé dir banna i èm flaté, i èm pass la pomad. Donk, konm la shanson i di, zot ishant lo lésh bote blouz-in shanson Eddy Mitchell sa, si mi tronp pa. Tok ! Pran sa pou ou.

Nb : In pti kozman pou la rout : « Mon kèr lé konm in kèr d’solèy ! » . Zot i koné, sa i fraz i sort dann shanson Fourcade avèk Fossy. Lo tit, mi pans sé « jenn jan kranèr ». Yèr té lo onz novanm, l’armistis konm zot i koné é l’armistis i arète la guèr. Yèr té osi la fin l’angazis indien donk in libérasyon pou in bonpé d’moun. Mi koné pa si zot kèr lé konm in kèr d’solèy, mé zot i pé fé travay zot koko, fé bouy zot matyèr griz, pou trouv in rézon pou ète optimmis é dé foi sa lé bien nésésèr.


Kanalreunion.com