Oté

Li antann mé li akout pa !

Justin / 26 séptanm 2015

Avan yèr o swar, zédi swar, mi argard in lémisyon d’si télé déor, té i tonm in pé tar, par rapor lo dékalaz orèr, mé té valé kan minm lo kou atann. Lo promié minis la frans té an védèt parl pi koman, i di lo lémisyon té fé éksopré pou li, é koté li navé in takon minis an parmi. Tousala té byin luilé, pou fé war a nou linité rant zot. La pass an rovi tout problinm di moman, bann migran la siri, shomaz ki éstab pou zot, larzan i donn lantropriz, boudikont ki profit pa nou pou lo moman, problinm sékirité, tousala.

Bann zournalis i poz késtyon, lo promié minis i réponn é an parmi navé osi kélké zintérvénan. In madam dann in parti i koz, li lé osi dann sindika i di. Promié a bor, pou komansé, li ansouplingn a li èk lo promié minis, li di konm sa, li yèm pa tro koman lot minis lékonomi i parl d’si fonksyonèr vik èl minm, èl lé fonksyonèr la pos la rotrèt, aprésa li di la vi lé dir pou li èk inn ti rotrèt. La dirèk li domann si lo boug i nyabou viv èk 1100 éro, sé sak li gingn konm rotrèt.

Vidaman, Lo boug la pa réponn, li la déviré. Lé vré, koman néna i fé pou viv èk 1100 éro ? Ala in bon késtyon. La kantité d’moun i viv èk sa la ba déor, souvan-dé – fwa èk mwin. Isi ni koné néna in takon i viv èk mwin ksa. Lo 52 pour san la popilasyon ann d’sou lo sèy la povroté, lo bann RSA, bann zagrikiltèr rotrété, bann zanplwa kontra édé, bann finn drwa lasédik tousala. Sanm pou mwin, kan i di lé dir èk 1100 éro, lo promié minis i antann mé li akout pa !


Kanalreunion.com