Oté

« Li fé kroir li manz do-ri Ségon, alé oir souvan li manz ranpang. »

In kozman pou la rout

Justin / 8 octob 2016

Kosa i lé do-ri Ségon ? Sa lété mèyèr ri moin la konète kan moin lété jenn, kan Mong-Hune téi sèr in pé pou papa-momon. L’avé poin pou toulmoun é désèrtin ri lété in pé dégolas é té pa vanté mi pé dir azot, do-ri Ségon sa té i manz an prékosyon, konm inn rarté, kékshoz i akonpagn poison, lo grin jone épi rougaye mang. Inn bonté mi di azot ! É ranpang kosa I lé ? Sé kan lo ri la krouté é ké demoun té i tir la krout pou manz avèk dé grinn sik, sansa dann lo karéman. Alor a koté lo moun i manz do-ri Ségon é sak i manz ranpang ni pé dir lé dé la pa dsi lo mèm marsh l’éskalyé sosyal. An plis, a koté la vérité nana lo mansonj é lé rar in moun té I avoué li manz arienk mayi sansa ranpang alé oir lé zot lé o-ri Ségon. Té i falé fé lo fyèr in pé ! Té i falé fèr in pé vantar ki tou-ni. Mé la vi lé konmsa é tanmyé sansa èl n’oré poin tro lo sharm. Alé ! ni artrouv pli d’van sipétadyé !


Kanalreunion.com