Oté

Li koné pa lir, li koné pa ékrir…

Justin / 15 févrié 2014

Déza po ékri si lordinatèr, obli pa léspas aprè virgil, poin, i apèl sa an fransé ponktiasyon.
Moin lapré koup mon brans pavoyié, nin pé i di lansan, in boug i pas la ék son kaskèt, li lapré fé son « jogging » ; ni fout in konversasyon ; li na déza 42 zan ; li apèl waro ; bon sa in non lé kouran ; ni koz ; a li li élèv bèf ; li vann bann mizilman ; in bèf inn tone li vann 4000 éro ; li lavé 4, 5 bèf li la fine vann dépi novanm ; la sar vann lo dernié po alé voyazé :

« - Ti abit pa somin intèl, an ba laba ? Non ti koné intèl ?
- Bin oui ton bèl sèr té marinn mon ti sèr, la sèr aprè moin.
- Ti koné mon bèl sèr lé mor ! brilé par lo gaz son propr gazinièr.
Alon war son kaz ; nou lé kapab war son garson zan-pièr. »
La nou ariv dovan lo kaz ; si lo mir na in non moin la ékri ék la pintir ; mi dmann mon kamarad : « ti giny lir sak lé marké si lo mir ? »
- non, mi koné pa lir,mi koné pa ékrir »

La Rényon é dan tout péi o monn , na zilétré i fé fonksyone lékonomi ; alon fé in kont sanm zot ; konbiin d moun otourd nou, la pa parti lékol, pouatan, si la pa zot, péi la i marsra pa konm i fo.
Zot na lintélizans plis ké sertin dantronou i koné lir ;nou obli a zot.
I koné pa lir, i koné pa ékrir, mé i koné viv !
« -Zordi fèt lé zamouré ;ou lé marié ?
- non,nou viv ansanm konm sa.
- a ou valantin,a él valantine, a la mi prézant a ou ma valantine ! »
Koné pa lir, koné pa ékrir, mé i koné la vi !

 Justin 


Kanalreunion.com