Oté

Li koné sak ni vé épi sirtou sak ni vé pa !

Témoignages.re / 28 avril 2012

Matant Zélida la ékrir Justin :

Mon shèr nové, mon spès salté,

Mi konpran pa pou kosa bann rouj-de-fon koman zot i fé lo fyèr konmsa. Pars zot i pans zot la gingné zot la ? Pars Hollande i ariv dovan lé zot, zot i kroi zot la ranport la viktoir zot la ? Sanm pou moin, Hollande-la, sa in sosyalis, la pa in rouj-de-fon, donk sé bann sosyalis ké la gingné. Alor, siouplé, in pti pé la modésti. Arzout èk sa, sa té arienk promyé tour. I rès dézyèm épi pèrsone i koné pa kosa lé riskab spasé dann dézyèm tour. L’èr-la m’a oir azot la. V’arèst azot arienk zot zyé pou pléré. Tok ! Pran sa pou toi.

Justin la fé pou répons :

Mon vyé matant k’i koz touzour la boush rouvèr,

Si mi konpran aou bien, mèm si nout parti la domann vot pou Hollande, sa la pa nout viktoir. Sirman sé sèt Sarko èk son dis-sèt pour san bann voi, sé li k’la gingné. Sak la gingné la pèrd é sak la pèrd la gingné. I vo myé antann in n’afèr konmsa plito ké an avoir grin bibas dann trou d’zorèy… Arzout èk sa, nou la gingn l’okazyon pou ésplik ali nout program — é nout program, sa lé séryé sa, la pa konm sèt d’ot ! — é moin lé sir li koné kosa ni vé… é kosa ni vé pa. Li lé prévni, é mi éspèr pa li vé kour lo risk in nouvo révolt. Tok ! Pran sa pou ou !

 Justin 


Kanalreunion.com