Oté

« Li na zargano dann né. »

In kozman pou la rout

Justin / 27 zanvié 2016

JPEG - 43.6 ko

Kosa i lé in z’argano ? Sé in z’ano an fèr. Ousa I mète sa ? Dann né désèrtin z’animo konm par ébzanp dann né bèf. Avèk lo z’argano I mète in shène sansa in kord, sansa ankor lé dé an mèm tan. Konmsa si ou i aral dsi la kord, bèf lé blijé ékout aou si tèlman sa I fé mal ali. Donk lo z’argano sé in z’outiy dominasyon.

Mé sa I mète osi avèk domoun sa ? An prinsip non sof kan li lé invizib é sa lé konmsa la plipar d’tan. Na d’moun lé dominèr, d’ot lé dominé : lo dominèr sé sak i poz lo z ’argano, lo dominé sé sak i port lo z’argano. In momon va di, an parlann son garson k’lé an ménaz é pars èl i pans li lé dominé : li nana lo z’argano dann né.

Zot i oi kosa èl i vé dir ? Kosa zot i anpans ? Arien ditou ? Fé travay z’ot koko ! Fé bouy z’ot matyèr griz ! Zot va oir ké, rant-rant, ni pé z’ète, tazantan, dakor rantre nou.


Kanalreunion.com