Oté

Lib ousinonsa zésklav ?

Justin / 16 zwiyé 2015

Lo 14 zyièt sé la fèt nasyonal fransèz. A nou osi nou té an parmi vik nou osi nou lé fransé i di. Pou banna la ba déor, sé la fèt de la libérté. An frans konm tou lé zan navé gran défilé si lé san élizé, navé bal popilèr, pou désertin la komans minm dopi lo 13 au swar. Banna i fèt la libérté par rapor la priz de la bastyi. Dann listwar la frans lo 14 zyièt i zoué in gran rol. Pou nou rényoné, kosa i roprézant lo 14 zyièt pou nou ? Konm pou banna la libérté ? Ousinonsa plito sé koué la libérté pou sak mwayin i mank ?

Mard, zistoman mwin té èk inn-dé dalon é dan nout kozé ansanm, lo problinm la “libérté lo 14 zyièt“pou nou lé v’ni dirèk. Konm désertin i di, i pé pa èt lo minm libérté vik néna in gran dékalaz rant nou isi é banna déor. Néna i di konm sa èk lo ti moné zot i gingn, i pé pa konsidèr a zot konm lib, èk 400 éro par mwa, kèl libérté mwin néna ? Lé vré mwin na lo drwa rant dann magazin é aprésa ? Kèl libérté ou néna kan ou lé oblizé domann touzour souplé, kiswa inn, kiswa lot, kiswa lo ccas, kiswa lo mèr…

I di in moun lé lib kan li apartyin pa in ot moun, kan li lé pa in zésklav boudikont. Sanm pou mwin in moun i pé pa di li lé konplétman lib si na pwin in pé légalité rant-rant. Mi tronp a mwin pétèt mé tank néna in tro gran dékalaz rantronou, tank néna in tro gran dékalaz rant nou èk la frans nout libérté sora a rovwar. Sépousa, sanm pou mwin, si ni vé gingn lo konba pou la libérté i fo gingn déza lo konba pou légalité. Pou réponn“Lib ou ésklav“.


Kanalreunion.com