Oté

Libérté ni èkri out non !

Justin / 13 zanvié 2015

Dann télé nou la vi, té bloké, té inn si lot, i prétan té pré d’kat milyon d’moun dann shomin dimansh pou manifésté la ba déor. Konm nou té i di lontan, zot la bat lo pavé, pou di zot kolèr, in pé zot pén osi. Tout kalité d’moun lavé, tout koulèr té la, sak lé blan, sak lé nwar, zarab, zuif, sinwa, sanm pou mwin navé d’moun étranj osi. Té la an frèr, té anbrass lin a lot, maniféstan min dan la min èk la poliss. Néna té i sort lwin. Shakinn lé v’ni, kiswa èk in désin, kiswa èk in éstilo ou kiswa ankor èk in bwat kréyon koulèr. Zournalis té poz lo minm késtyon, poukoué zot lé la ? Tout lavé lo minm répons, nou lé la pou pou sobat pou la libérté.

Tout lavé minm non zour la, tout té apèl Charlie. Lèr la lavé pwin David, lavé pwin Mohamed, lavé pwin Natacha, lavé pwin Samuel, lavé pwin Jean-pièr, tout té apèl Charlie. Tout lé v’ni pou minm zafèr, tout lé v’ni pou minm koz, pou défann la libérté. Minm si nou lé pa touzour dakor èk sak bann zournalis i ékri ousinosa èk sak bann désinatèr i désinn, pa pou sa i fo rotir la libérté banna. In boug la di « minm si mwin lé pa dakor èk sak banna i èkri, ma sobat touzour pouk zot i kontinié ékri »La libérté ékri sé sa.

Ni pé pa imaziné in sosiété san zournalis, Koman ni pé konèt sak i éspass ayèr si na pwin zounal ? Minm sak i éspass sou not zoryé ni pé pa konèt.A nou la Rényon ni koné koué i vé dir anpèsh in zournal ékri, konbyin fwa « Témwaniaz »té sézi ? La èsèy tout manièr pou anpèsh a li port son lékléraz, orozman Paul èk son bann dalon la pa larg lo kor. Dopi lo tan ni sobat pou la libérté. La libérté kozé, la libérté krétik lin a lot, la libérté. Mé kosa i lé la libérté kan ou na pwin ryin, kan ou na pwin travay, kan ou kont pou la po patat. Kan minm, Libérté ni ékri out non !


Kanalreunion.com