Oté

« Linz sal i lav an famiy ! »

In kozman pou la rout

Justin / 30 out 2016

Mi koné pa kisa la invant proverb-la. Mi pans pa sa in provèrb rényoné pars moin la fiine trouva li in pé dann tout péi. Tout fason, pèrsone na poin droi d’otèr la dsi, donk mi pé di mon dé mo dsi kozman-la. Dabor, mi pans li done demoun in bon konsèy : kan nana in problèm pou réglé dann in famiy é ké lé posib la solisyon lo problèm lé riskab fé déga, i vo myé règ ali san tro fé dézord. Mé zot I pé dir amoin la famiy sré konm in mafia ! Pou kosa ? Pars i aplik in loi k’i apèl lo loi lo silans : moins i fé dézord, plis lé bon. La Mafya sé galman la politik ! Osinonsa lo mond lo biznès. Pou kosa ? Pars konbien krime, konbien mové z’aksyon i komète dann in mond konmsa. Dann tout péi ! Sa lé sir ! Pa toultan mé sa i ariv kant mèm é l’aktyalité lé ranpli avèk bann mové z’aksyon bann politik, sansa bann biznèsmane. Alé ! Ni artrouv pli d’van.


Kanalreunion.com