Oté

Lipèraktivité, lé bon, lé pa bon ? Avan lèr lé pa lèr, apré lèr lé pi lèr !

Justin / 5 novanm 2013

Zot i koné lo provèrb : « L’égzaktitud, sé la politès dé roi » ?
Lot zour, mi antann èk JF po moin giny son kamionèt po alé trap dé-troi palèt Plèn des Kaf, èk dé vyé portay an fèr.
Nou di 7èr, pars 7èr é demi, lo propriétèr CKB i di li sra la.
Mi kal mon révèy si 6 zèr…
A la pa mon JF la ariv 5èr é demi ! Lé vré, la zourné i ralonz ; bonèr, bonèr i fé klèr : mé oté, 5èr é demi, mi dor ankor !
Bon, pran lo soulyé, mèt sou l’bra, anfil lo pantalon èk lo dé savat, grinp koté sofèr, lo zyé pokor dékarkiyié, la mèm pa giny lo tan boir in kafé, alon mont dan la fré !
Lo problèm, sé k’ni ariv la Plén 6èr in kar ! CKB pa la ! Bon, li la mèt lo dé portay métalik déor, ti pé pa prann anndan ni palèt, ni dot soz, donk toué lé oblizé atann !
Agard bèf kour déryèr traktèr i aport manzé po zot, koz si la vi, dé soz é dot, pass lo tan, anbark sak ou giny, mé par koréksyon, ti pé pa partir konm in volèr.
I sèrv a ryin ariv avan lèr, mèm si ti di a moin toué lé konm in provizèr lisé èk lanploi di tan bann profésèr, si ti dékal tro tar, tout i repous é la nuit toué la pa giny fé sak ti dévé fé, silfat ton ponm tèr, mèt fimyé, donn zèrb lo bann lapin, débrous lot térin sépa kèl koté.
A ou, atansyon lipèraktivité, mi koné pa si sa lé bon ou sa la pa bon.
Tout fason, ti kour ti kour (La Fontaine, in lékrivin fransé i dizé pa : « i sèr a ryinn kourir, i fo partir kan i fo ») ? Vo myé ti kalkil bien avan koué ti sar fé : koman, kan, konbyin d’tan ?
Avan lèr lé pa lèr, apré lèr lé pi lèr !

 Justin 


Kanalreunion.com