Oté

Listoir la pa in diné d’gala, ni in gran raid version Chicaud !

J.B. / 13 désanm 2013

Nana kèk somenn moin lété la kan la drès kabaré in éstatu pou rapèl lo malèr bann zanfan La Kreuz. Pou mon par moin lété kontan pou tout bann Rényoné la soufèr la déportasion é moin la bien aprésyé l’éstatu Nelson Boyer. Nout zournal pou son par la bien aprésyé so lévènman galman é pou sak la obliyé, mi rapèl azot tout sak nout parti la fé pou dénons la déportasion bann zanfan La Rényon. Nou la vi sa konm in komansman pou la réparasion, pars la pa zordi, la pa domin i fodra réparé sak nout zénès la sibi. 

Astèr nana in pé lé kont sa. Lé normal pars zot i pans ankor té pou lo bien bann zanfan la anvoy azot déor. Mi diré mèm, pou in pé, té in bon n’afèr pars sa té i fé parti in plan pou anpèsh sak désèrtin téi apèl lo séparatism. Konm i fé pa zomelèt san kass do zèf, té inn an parmi lo bann pri bann Rényoné té i doi péyé pou konbat lo soi dizan séparatism. Zordi, moin lé sir na in pé i pans ankor sa kan zot i ariv Zilo épi zot i oi l’éstatu.

Na dé troi zour moin la antann Robert Chicaud apré di li pronons pa li dsi lo léstatu an li mèm é li di pa téi fo fé, té fo pa fé. Li di solman téi falé pa fé sa l’androi la fé pars solon li l’anplasman i apartien lo gran raid. Lé bizar ! Moin té i kroi lo propriyétèr lété la CCIR é mèm si lo gran raid té tiliz so plas la inn foi par an, sa la pa in droi pou li. Moin téi kroi sa té la tèr La Rényon é té zistis done in plas son bann zanfan pou mète lo léstatu... Landroi zot la kit zot péi, landroi zot i rovien in zour.

I paré in pé lé jéné par l’éstatu, lé mèm jéné pars sa i rapèl lo mové koté la politik Debré. Mé, zot i vé, zot i vé pa, listoir sé listoir é tout fason pa in diné d’gala. La pa non pli in gran raid vèrsion Robert Chicaud.

J.B.

NB : Zis in késtyon : lo gran raid i pas dann l’androi demoun zésklav la parti an maronaj, pou kosa dopi li égzis li la pa arèt bann kourèr in l’androi kansréti pou in minit silans pou nout zansèt déporté, tortiré, abésé plis ké zanimo. Pou kosa in ? Shakinnn i pé an avoir son répons, é lé myène lé paré dopi lontan.


Kanalreunion.com