Oté

Listoir La Rényon ? Lé a pène kroiyab in n’afèr konmsa !

Justin / 9 octob 2015

Zot la romarké koman i gaskone l’istoir dann nout péi ? Isi sé in l’abitid, sak la lité pou fé in n’afèr, i obli azot fasilman é sak la pa fé arien zot i vien pavané dan l’androi pou fé valoir z’ot gro zabo é lo moun lé sitèlman pa o kouran k’i bate la min pou zot. Sansa i pans pou vréman sé zot la fé !

In l’égzanp : maloya. Sé parti kominis, sé lo Fjar, Témoignage krétien épi d’ot ankor la lité pou donn sa favèr. Mi koné mèm inn-dé pèrsone laté kondané pars zot la parti zoué maloya dsi la plaz*. Mi koné osi bann z’ansien kan zot té i sort dann shomin lo vin désanm té i blok azot o post polis tout la zourné konmsa zot i gingn pa mark la fète l’abolisyon. Sa i anpèsh pa, zordi, in pé d’moun la pa fé arien pou sa, mèm zot la fé tout pou toufé é sé zot k’i pavane dovan l’moun mèm dann la télé. Si tèlman ké zot i obli signalé ké sé dann tan la MCUR avèk Carpanin Marimoutou épi Françoise Vergès, é d’ot ankor ké la fé lo dosyé dsi maloya porté dovan l’unesco.

Moin la ziska antann in zour kan zournalis té i poz késtyon dsi la loi d’départmantalizasyon ké sé Michel Debré la fé vote loi-la. Lo késtyonèr la pa di arien é sa la pas dann télé tèl k’i lé… Lé kant mèm domaz isi La Rényon nou na poin in l’asosyasion pou donn l’alèrt kan nana in l’évènman inportan é pou mète la vérité noir sir blan, é sirtou pa fé gaskone in n’afèr konmsa.

In bon dalon la di amoin sé lo 23oktob 1945, ké bann kréol la voté pou zéléksyon dépité-bann madam osi la voté-Isi La Rényon nou la mète Raymond vergès épi Léon de Lépervenche anlèr épi ni koné sa la déboush dési la loi 19 mars 1946, loi pou La Rényon départman fransé ; donk pou li sé lo 23 oktob, la klé é i fo pa gnor sa. Malérèzman i diré nou la fine obliyé. Lé a pène kroiyab in n’afèr konmsa !


Kanalreunion.com