Oté

Lo biomimétism ? kèl bon l’okazyon pou nou ? … sof si sé pou angrès lé z’ot !

Justin / 4 mé 2015

« L’ékonomi la konésans, ala l’avnir La Rényon. » Sa sé in n’afèr té i pé lir dann zournal Lo Poin la parète vantredi 24 avril. Kisa la fé sa ? In onm de syans i apèl Idriss J Aberkane dsi lo sit internet lo zournal. Solon li, i fo in gro l’invéstisman dann lo biodivèrsité pou dévlop bann pouvo téknolozi . Pou gingn kosa ? Solon l’onm de syans, éspésyalis bann neuro syans, sa i roprézant in marshé plis mil milyar dollar. Nana do koi mète do bèr dsi lo zépinar é pa arienk sa !

Lo savan i vé parl lo bio-mimétism (l’émitasyon bann zanimo pou tir parti zot kapab) épi li di nana in an l’iniversité Vancouver la mète o poin in prozé i apèl « Abigaille », in robo sis pate kapab grinp dsi bann mir épi va zoué in bon rol pou ésplor l’éspas. Kèl zanimo la donn so l’idé solon zot ? Lo géko diurne, pousyèr do l’or… Si zot i vé, sé nout margouya, é pa pliské sa : so lézar ni vé tyé kan li rant dan la kaz pars li fé tak-tak-tak épi li larg son pisa tazantan é li Sali nout zoli mir… Ala ké sé li k’i pèrmète fé lo masine moin la di an-o la.

Pou lo savan nou la parlé : « La konésans sé nout nouvo pétrol é la biodivèrsité in gran rézèrvoir la konésans » - li di mèm in rézèrvoir imans ! Nout péi La Rényon sé in gran sant pou la biodivèrsité é in rézèrvoir « imans » pou la konésans, in gran trézor pou mète an valèr. L’èr-la, ni koné ousa i lé nout trézor, mé kisa i sa mète sa an valèr é kisa i sava an profité. Si ni gingn tir nout tar, lé bon pou nou, si ni gingn pa arien é si ni dobout gète…
Kèl okazyon manké mé z’ami , si sé pou angrès lé z’ot.

NB in nouvèl moin la lir dann Imaz press reunion.


Kanalreunion.com