Oté

Lo Brexit dann Roiyom ini : Kan inn plis inn i fé pi dé !

Justin / 7 zwiyé 2016

Roiyom ini lé dann fé-noir dopi ké lo pèp la vot pou sort dann l’erop (l’inyon éropéène si zot I vé). Koman in n’afèr konmsa l’arivé ?

La komans par lo fotbal : bann z’anglé laté éliminé dann uityèm final par bann zislandé, in pti lékip, lo lantrénèr i fé moityé d’tan antrénèr, moityé d’tan son métyé rashèr d’dan (dentis si zot i vé). Akoz bann z’anglé la pèrd ? Pars zot lété éstrésé par lo brexit bien sir !

Aprésa, sé bann zournalis lo Sun (solèy) la komans douté, la di konmsa la pa bézoin pous azot tro pou ké zot i démisyone z’ot métyé zournalis : lo Sun l’avé amenn la guèr kont l’érop dann la kanpagn pou lo Brexit.

Armète èk sa la moné bann z’anglé (la liv), i dégrenn, i dsann, i dsann, i ariv o-fon. Mèm in dépité l’érop in shèf an parmi bann brexité la démisyone son parti.

Arzout èk sa la di sé bann moun fénoir, sé bann demoun égri, bann demoun tro kouyon pou réisi dan la vi, bann vilin moun, ké la vote pou lo séparasyon. Bann moun ékléré, la vote kont lo séparasyon. In milyardèr la pass dann télé pou di : koman-koman i fo anil référandome la.

Aprésa ankor na in plan pou tir La city (kartyé l’arzan) dann London pou amenn ali Edinbour (kapital l’ékos), sinonsa Pari, sansa dann La Hollande pétète ankor dann péi bann bèlj. Sansa pou fé marsh la city avèk bann règloman éropéin donk fé kommann ali dopi l’erop.

Armète la dsi, dann lo pli gran sogré bann z’ékip la komans travaye pou amontr avèk lo brexit lo pib (lo kontèr la rishès). Lo Grann-Brétagn va dégrenn 4,5 pou san… Koman i fé in n’afèr konmsa ? Fastoch lé ga .I sifi fé rant dann bann mashine lo règloman ki sui : inn plis inn i fé pi dé, inn plis inn i fé 1,91. Sa lé posib sa ? tout lé posib koméla*.

Nb Avèk sa tout z’anglé i sa pèrd près sink pour san sak zot nana. Bin oui, ga, sa lé marké dann mashine !


Kanalreunion.com