Oté

Lo gob i rofèrm firamézir !

Justin / 2 avril 2016

Aforstan zoué la ponp èk nou, té a provwar in zour ou lot domoun noré i l’égrèr d’si léstoma par rapor lo pilitik lé méné zordi. La pa manké, avantyèr domoun la d’sann in kou dann shomin. Pwatan lo tan lavé frédi in pé déor, lavé la pli, minm sa, domoun té an poundiak dann shomin. Dabitid pou nargué banna i di navé trwa-kat konm sa. Mé la sir é sértin, èk la lwa, néna i di lo prézidan la mèt a éli dann in gob, néna i di minm li sé lo éspésyalis lo gob.

Pou kosa ? Avansa, avan zédi li la rokilé d’si la déshéans de nationalité. An gro li la larg lo kor d’si in nafèr, d’si in tramay fé éxopré pou may la drwat swa-dizan, ala k’sé li ki may dodan. La lwa kont lo kod di travay, i tonm in gob osi vik zordi lo gouvérnman i vé fé lo travay la drwat zis pou zoué orzé èk li. Lé vré nou néna l’abitid war dann shomin domoun kont an kolèr, domoun kont parti, mé la, la plipar d’moun la vot pou lo prézidan.

Konm touzour néna in batay d’si lo shif 400000 pou désertin, 1 million pou dot, mé tout lé dakor pou di la kol pistash i pran é déza néna la finn pran randé-vou pou lo 5 é lo 9 mars. Konm li lé randi, i di, li lé pi an otèr fé kwak-so-swa. Li tonm ba dann sondaz, 70 pour san d’moun lé kont la lwa El-Komri, son kan i tonm dékartyè, la zénèss i tourn lo do, donk firamézi lo gob i rofèrm dosi li. Mé kisa l’otèr ?


Kanalreunion.com