Oté

Lo kapitol lé kosté sanm la rosh tarpéiène !

Justin / 1 avril 2015

Matant Zélida la ékrir Justin :

Mon shèr nové, mon spès salté, rouj de fon dovan l’éternité, bann gosh i sort gingn in bon kalote pou zéléksyon kisoi dan La Frans, kisoi dann péi l’outre-mèr la Rényon konpri. Pou kosa la gingn so kalote-la ? Sanm pou moin, pars demoun téi kroi bann promès Fransoi Hollande é lété in bann promès pou la po d’patat. Tout fason la gosh la touzour été konmsa : promès, promès, promès, bla, blabla, blablabla é pou lo rès konm di lo kont, kroiyé moi é fouté vou d’dan. Tok ! Pran sa pou toi !

Justin la fé pou répons :

Mon vyé matant k’i koz touzour la boush rouvèr, vi koné vi fatig amoin avèk vot késtyonn droit « bot késtyonn gosh. A koz ? Pars si mi tronp pa Holland la pa vouli aplik in n’ot politik ké sat Sarkozy la améné é si li l’avé aplik son program pou La Frans lé shoz nora pa été konm zot i lé zordi si solman Holland l’avé rédi lo rin dovan madam Merkel. Si li l’avé rédi lorin, banna l’avé poin lo moiyin zèt La frans konm in vyèy shosète épi li nora rann sèrvis bann péi dann la difikilté konm La Grès, Portigal, l’Espagn épi d’ot ankor.

Pou La Rényon Holland la tonm dakor avèk bann sosyalis péi konm lo nomé Vergoz, é zot la ankouraz Didier Robert dann son mové politik. Si tèlman, konm di lo kont, pyé doné shoval monté, é li la donn lé z’arm pou konbat bann sosyalis. Donk banna la tir zot mèm in bal dann zot pyé… Zordi zot i rann azot kont paer zot mèm lo kou i fémal sirtou pou sak la pankor tro gagné.. Mé, konm provèrb romin té i di : « lo kapitol lé kosté sanm la rosh tarpéyène ! ». Tok ! Pran sa pou ou !


Kanalreunion.com