Oté

Lo kou d’fors Didier Robert : É si lo tan lontan té i arvyin ?

Justin / 27 séptanm 2010

Na dé foi, in n’afèr, dann la tète demoun i somèy. I pé kroir tan-la i arvyin ar pi. Mé ala, tout-in kou, kékshoz i fé arviv lo mor ; I amontr sak la spassé fit-in-tan lé kapab ariv ankor in kou. Grate solman in pé la koush anlèr é lé possib oir sak nana ann d’sou... lo tan ansyin i arvyin.
Bann z’ansyin la byin konète lo tan la frode éléktoral, lo tan nèrvis é sète la réprésyon kont bann viktime sak i déside rézisté. Nou la konète ossi lo tan bann gran zournal — l’avé inn mèm dann tan-la !, la télé-l’avé inn mèm ! — té i bate tanbour pou mète bann frodèr an l’èr é i tape déssi bann viktime. Byin antandi, bann frodèr té i pans zot té dann zot bon droi, é zot té i manyé la vyolans bon kèr, épi galman la koripsyon, i gonf zot pla san tro forsé.
Tan-la lé fini ? Ni pé pans sa konmsa. Ni oir ar pi z’afèr konm sa ! Mé nou lé pa sir, pars an parmi toute bann frodèr, moin la pa antann inn argrété. An parmi tout bann profitèr, pèrsone la pa di li fèr ar pi. Alor si ni pran pa nout prékosyon, si ni dénons pa tout sak lé pa konform la démokrasi, si ni lèss in pé fèr, kossa va rivé ?
Kan in prézidan la Réjyon i fé kou d’fors, konm Didier Robert la fé, ni pé an avoir la krintiv lo tan lontan i arvyin.

Justin


Kanalreunion.com