Oté

Lo mèr i komann anou !

Justin / 12 mars 2015

Kissa la di zanplwayè kominal néna in léstati ki protèz a zot, zot i travay pou la kominn, pou la popilasyon, i travay pa pou lo mèr i prétan. Bann titilèr pétèt mé lo rès ? Foutor la pa lo mèr ki pèy a zot èk son larzan pérsonèl, i pèy èk larzan la kominn. An so moman dan la kanpagn éléktoral, mi antann tout, lo total èk lo kapital. Néna sak i di « mi bèz pa koud pié dan mon pla manzé ». Konm si lo mèr i ansèrv la kantinn, dot i di pou rézon « lo mèr i nouri a mwin, mi vot pou lo mèr, mi atann mon titilarizasyon èk lo mèr donkalor kont pa si mwin »

Ou sinonsa ankor « lo mèr la promèt anbosh mon zanfan »mi atann « lo mèr i sar déklass térin momon ». Koué mi antann pa dan so kanpagn éléktoral ? In, si ou vé koz èk mwin, odrémié pa fé war, pass la kaz a swar fé nwar, gro fénwar, konm sa na pwin pérsonn i wa nou. In, out papié la, pangar moun i wa, glis a li an misouk dann mon posh, ma li apré. Mi rokoné sé out bor la rokrit a mwin mé zordi mi gingn pi bouzé. Ala la sitiasyon bann travayèr la komminn.

Sak mwin la konpri zordi, lo mèr i fé lo mové tan konm li fé lo bo tan, konm li vé. Mank do po, an so moman sé plito la pli. Néna i krwa minm, néna kaméra dann lizolwar, ousinonsa kan li sort dann lizolwar i wa pou ki li la voté. Momandoné mi konpran poukoué bann mèr i rofiz titilariz bann travayèr la kominn. Li pé pa koup la kord pou banna é anmar a li avèk. Inn la di a mwin, dopi trantan mi atann, konm i sava mi pé atann ankor trantan vik sé lo mèr ki komann anou !


Kanalreunion.com