Oté

Lo mèr la Pti-Til èk lo fron nasyonal ?

Justin / 1 désanm 2015

Sanm pou mwin so zéléksyon rézyonal ki vyin lé pou fé pèrd la tèt inn dé. Lo mèr la Pti-Til dann in lèt ké li la anvoy la popilasyon la Pti-Til li ésplik poukoué li pran arpa par zéléksyon rézyonal. An o la lèt, konm li pran domoun konm domoun i sort déryèr solèy, li donn déza in loson d’si la konpétans la Rézyon. Aprésa li di konm sa, li donn pa konsinn de vot, mé li provwin : son diton a li, sirtou vot pa pou dé lis. Vot pa pou Patrik Lebreton é vot pa pou René Paul Victoria.

Poukoué, pou li, fo pa vot pou sé dé lis la ? Parské d’si dé lis la néna dé zopozan a li. Si la lis Patrick Lebreton néna nout kamarad Fabrice Lebon é si la lis Victoria néna Madam Hoarau, tou lé dé i tonm zopozan pou vréman lo mèr Serge Hoareau. Lo mèr i koné pi ni son dovan ni son déryèr. Pou zélèzsyon minisipal, li té a gosh i prétan, pou zéléksyon départmantal li la kalbit èk l’UMP é la zordi li donn pa konsinn de vot. Mantèr, i di an misouk li roul pou Didiér Robert.

Parl fèt si li di, fo pa vot ni pou Patrick Lebreton, ni pou Victoria boudikont kaziman li di vot pou lo rèss, kaziman li donn konsinn pou vot pou lé dis lis ki rèss é anndanla néna osi lo fron nasyonal. Ni mèt sa d’si lo kont la zénèss ousinonsa d’si lo kont la kouyonis ? Ousinonsa li azi an konésans de koz ? Ou koné, na pi aryin pou étonn a nou. Gramoun na rézon kan i di konm sa “Avan kozé, odrémié tourn la lang sèt fwa dann la boush“.


Kanalreunion.com