Oté

Lo Pap Benoit 16 i démisyone son sharj konm pap !

Justin / 12 février 2013

Mi souvien, na in bon koup de tan, in dalon téi di an parlann le pap : « Konbien divizion li nana ? ». Moin té i trouv son kozman téi fé rir pars mi pans li té di sa avèk l’anvi plézanté. Pars si i rogard bien, Vatikan sé pa in gran l’éta, épi l’armé lo pap sré pa kapab kroiz avèk sète lé zot z’éta, mèm an aparmi sak lé pli pti. Par raport l’ékonomi, moin la touzour antann lo vatikan lé rish, mé fransh vérité moin la zamé rode dann liv lo vré èk lo fo. Pou kosa ? Pars mi oi pa tro kosa i ansèrv alé rod in n’afèr konmsa.

Pars na d’ot poinn vizé lé pli inportan ké sa. Dabor lo pap sé lo shèf légliz katolik. Arzout èk sa légliz katolik, d’apré sak mi kroi, na plis fidèl ké lé zot rolijyon é nana katolik dann tout péi par kantité. I fo dir osi sa in légliz i égzis dopi plis dé mil z’ané... Mi sar pa fé son bilan, mé mi koné li lé plito konsékan. Mi pé dir ankor légliz katolik la konète bouj avèk son tan : li la pa arète fijé in foi pou tout. Astèr biensir nana roprosh pou fé ali, suivan la manyèr li la travèrs l’istoir mondyal. Sa, ni koné. Sa toulmoun i koné é si ou i vé antann bann téolojien, bann zistorien, ou i pé komans zordi san savoir kansa ou v’arété.

Astèr dsi la késtyonn lo pap, i pé dir, près tout, sé bann gran pèrsonalité é zot valèr sprityèl i doi pa ète zété. Moin pèrsonèl moin la konèt lo rol Jean XXIII é té pa in rol néglijab. Konm toulmoun moin la antann Jean-Paul II fé son bann prédikasion. Kan Jean-Paul II lé mor la dézign in n’ot kardinal konm pap. Moin pèrsonèl moin la pans té in pap tranzision, mé moin la pa di tro for, pars konbien la di sa galman pou Jean 23 é moin la fine di li la lès son mark dsi la vi spirityèl - mé pa solman !- dann son tan é ziska zordi.

Zordi Benoit 16 i anons li abandone son sharj, in gran désizyon, in désizyon grav, in désizyon inportan é sar in nouvèl inportan pou in gran kantité d’moun, mèm pou lo mond antyé. Mèm san divizyo l’armé.

Justin


Kanalreunion.com