Oté

Lo plan sogré dé mésyé Kamérone : apré li lo déliz !

Justin / 4 zwiyé 2016

L’otrozour, kan la fé kanpagn pou ronouvèl bann dépité dann parlman bann z’anglé, mésyé Kamérone la trouv in z’atou térib : pou gingn lo voi tout bann z’anglé lé fatigé avèk l’Erop, li la di li va roganiz in référandome pou arésté sansa kité l’inyon éropéène. Li la ranport in gran viktoir mé konm k’i diré in viktoir konm sète Pyrus donk si zot i vé in viktoir-kokman.

Astèr, kan li désid réspèk son promès li domann bann gran péi l’erop pass la lang sou son pyé : li domann a dépans moins pou li gingn plis é lo bann gran péi l’érop i konsan. Donk l’afèr lé bon, ala ké li anons son référandome. Solon li lo pèp i sava désid rès dann l’erop. Solman la koup la manké bann z’anglé la vot lo brexit.

Mé ala ké zordi, ni li, ni l’ kan lo brexit, la pa kalkil kosa i fo fé si bann z’anglé i vote « sort ». Pars kan ou i lès demoun shoizi, ou i pèz lo pour, avèk lo kont. Ou i fé in program pou in ka é in program pou l’ot ka. Sa lé konm in zé d’dame : ou i sava déplas in pyon é ou i kalkil lo l’advèrsèr i sa manz aou dé pyon par égzanp é ou i sava, an rotour, manz ali sink-sis. Donk lo kou lé bon pou ou. Ou i pousout pyon é sak ou la prévi i ariv.

Dann in ka konm lo « brexit » ou i fé in plan sogré. Astèr demoun i domann kèl sé lo plan sogré mésyé Kamérone pars li la pa kant mèm lo komnsman d’in kouyon, donk li nana in plan. Li na in plan toulbon, li nana mèm in plan sogré, sé ké li napoinn plan ditou. Ala son sogré ! apré li lo déliz !


Kanalreunion.com