Oté

Lo pli méyèr sondaz sé lo pèp !

Justin / 9 zwiyé 2015

Kèl valèr ni dwa donn in sondaz ? Ni dwa konsidèr in sondaz konm in sianz ? Déza néna sondaz èk sondaz. Domoun i pé fé in sondaz térin pou war si y nyabou mont in kaz dosi, si lo térin i pé anpar la kaz boudikont, lo pwa, tousala. I pé fé in sondaz osi pou war si in moun lé pa malad, mèt in sond èk in moun pou fé in prélévman. Dé fwa i pé fé in sodaz osi dann la popilasyon, dizon la sé in métod pou analiz in popilasyon kiswa domoun, kiswa zanimo a partir in léshantyon. A mwin mi di tousala sé bon sondaz pou fé avansé pa pou fé rokilé.

Mé, néna osi sondaz domoun, sondaz i fé dann zéléksyon pou war kèl bordaz domoun i lé, sa parkont fo fé antansyon. Sominn dérnié mwin la suiv zaktialité grèk. Zis avan zéléksyon banna i sort in sondaz ki donn lo oui dovan, sar séré i di mé lé sir lo oui va ginyé. Tout la somin la basinn a nou èk lo oui. Dimansh o swar i arsort a nou in ot sondaz “sorti dé zirn so kou si“la i di a nou lo non s’ré dovan mé zis-zis. Lo vré sondaz sé sak lo pèp grèk la donn a zot dan lé zir.

Sa i rapèl a mwin in sondaz té fé isi la rényon zis avan zéléksyon minisipal dan louès. In sondaz la fé lo tour babylonn, banna la anvoy di partou èk zournal, radio, télé. Rapèl a zot, té in sèl son, la mèr sin pol lé éli promié tour. In sondaz séryé i pé donn inn ti lékar 48/52 mé pa 62/38, la i apèl plito“in lastik“. Kiswa lo linstiti la pa nyabou, donkalor la li lé pa kapab, kiswa zot la manipil do moun pou fé vot oui é la lé grav. Sanm pou mwin, lo pli méyèr sondaz a fyié dsi sé lo pèp !


Kanalreunion.com