Oté

Lo poi sak marmay l’ékol,

Témoignages.re / 28 septembre 2013

Poukoué mi parl sa so matin ? Pars yèr soir, dann in télé, mi oua in résponsab la FCPE, paran d’élèv, la pré koz sa Sint-Ane si in l’établisman éskolèr.

E na lontan, so fédérasyon i batay la d’si ; ésay fé konprann l’institisyon, sétadir l’édikasyon nasyonal, respèk in prinsip.

Na in loi i di, lo sak lo z’anfan i doi pa dépas 10% son poi. Ma ékspliké pou sat lé pa tro for an kalkul. Si lo z’élèv i fé 30 kilo, lo kartab i pé ariv 3 kilo, pa plis ! A pé pré.

Mé gèt in kou lo zèn i rant an 6ème, o kolèz ; li na 11 z’an ; li la pèr son bann profésèr va dir a li i mank sa, i mank si ; li mèt lo maximom ; rézilta : son do lé panshé an avan, li mars déza konm in vyé moun na in bos si son do ; li déform son l’éskélèt. Koman ti vé li grandi normalman, sirtou li lé an plèn kroisans.

La FCPE la mèt ali dakor èk sindika kiné pou pèz pli for si bann minis, gouvèrnman, si parlmantèr, sénatèr, pou zot sanz sa ; ti pa ti pa ; i fo ni ariv fé konprann bann mèt l’ékol, aranz a zot pou ke lo kayé, lo liv lé moin lour ; sinon aranz par ékip z’élèv mèm klas, in i aport fransé, lot i aport l’anglé !

Ankor myé, mèt bann kour an informatik, sra ankor méyèr.

Na z’établisman i mèt in kazyé pou lo bann z’élèv i manz la kantine : i mèt zot z’afèr l’apré-midi dan zot cazyé èk in kadna tout…

Trouv solisyon ; a nou paran dann konsey l’administrasyon, alon réklamé.

Sinon tou so bann zénérasyon va fini dann kabiné kiné pou ardrès zot kor kan zot sra plis azé.

Non, vréman, sé in problèm santé piblik so sak tro lour ! Sa lé vré.

 Justin 


Kanalreunion.com