Oté

Lo prézidan é lo bann rish : Karnaval, shakinn son bann !

Justin / 7 séptanm 2010

Lé pa possib antann in n’afèr komsa ! Fransh vérité, na d’moun i di n’inport de koa ! Koa ? Figuir azot, na in pé i di Sarkozy sé lo prézidan bann rish. Lé pa normal di in n’afèr komsa ! Dabor inn, pars li lé pa rish. Li fé pa pityé dakor, mé rish, non. Donk li pé pa ète prézidan bann rish. Solman li pé, konm prézidan, ète in bon sèrvitèr bann rish. Sèrvitèr, oui ! Prézidan, non !

In raz-a-sèk !

Bin li lé prézidan kossa ? La France, byinsir. Mé sirtou prézidan toute la bann gogo, sak la kroir lo boug i sava fé in bon politik pou zot... Pou komansé, sak la kroir i fo travay plis pou gingn plis… sé in n’afèr k’la fini an lo d’boudin. Épi, pou toute sak la kroir lo bann ti rotrète, lo bann lokasyon andikap, té i sava gingn in bon la rogoumantasyon… zot léspoir la kass par boute. Nana ossi bann amontrèr lékol, lo boug l’avé promète azot in rovni konm k’i fo… é konm sèr Ann, zot i oi pa aryin arivé. Arzoute èk sa, sak la pans té i sava nétoiye bann délinkan èk in karshèr. Ma shèr, mé la koupe la manké ! Anfin, pou fèr pli kourt, dizon li lé prézidan toute demoun li la roul dan la farine. Dizon in razèr-sèk !

Lo rish i rokoné son bann !

La pa tro lontan, moin la antan lo lékspréssyon : le roi bann la tyé kouyon pou pran son plass, pars pou ète lo roi banna, i fo ète konm banna. I pé di ossi lo prézidan so bann katégori-la, é lé byin vré, pou ète prézidan banna, i fo ète konm banna. Touléka, sé sak mi kroi… an parlan par réspé. Mé pétète mi tronp… solman na in n’afèr mi tronp pa, sé k’in pé i gouvèrn dann lintéré bann rish, san k’bannn rish i rokonète azot konm zot shèf. Konm di lo patoi, karnaval, shakinn son bann.

Justin


Kanalreunion.com