Oté

Lo pri lo gaz i done di gaz ! Désèrtin kapitalis i gonf zot pla !

Témoignages.re / 3 zanvié 2014

Lo pri la boutèy lo gaz i sava goumant in kou Baya ! Ziska moi d’désanm in boutèy lo gaz té i vann 21,80 éro. A partir d’zanvyé i sava vann 24,37 éro donkalor 2,57 éro an plis. Konm di lo kont, sa i kass pa lé kat pate in kanar : kou k’i lé dé éro sinkant sète ? Kou k’i lé ? Troi bagète do pin an moins… plis dé kilo do ri an moins, sansa ankor in lite édmi d’luil. Ni pé kontinyé konmsa tout in list produi. Mé dsi kisa i sava tir la tar ? Dsi bann pov é banna l’avé pa bézoin in n’afèr konmsa. Si i kontinyé mi oi pa koman i sava batay kont la mizèr.

Moin na in dalon, i diré li nana in masine a kalkilé dann son tète é so fiy d’gars-la, la di amoin konmsa. Par raport lo chariot-type, sanm pou li la pa in for l’ogmantasion. Pou kosa ? Pars solon li lo gaz i goumant par-la 11 pour san, mé lo chariot-type la goumant trant pour san dann in n’ané. Donk d’apré li lo pri lo gaz na ankor la plas pou goumanté. Moin la di ali, sort dovan moin, pars kalkil konmsa li pé gard pou li é pétète galman pou mésyé Lurel. Pétète galman poiu mésyé Didier la vèrs larzan dann la posh bann pétrolyé pou fé in pri éléktoral kinz éro solman… apré la larg sa li. Moun vilin nana, mé moun kouyon la ras i pèrd firamézir.

Mé la pa la mi vé arivé. Mi vé fé in konparézon... avèk l’il Moris. La-ba, boutèy lo gaz douz kilo i vann 330 roupi. Sa i fé 7,95 éro, donk troi foi moin shèr ké La Rényon. akoz sa ? Moin pèrsonèl mi koné pa, sof pétète ké ni shoizi alé ashté marshandiz pli shèr ké nana partou. Donk dsi nout fron lé marké kouyon ! Pa dsi l’froon bann kapitalis ! In n’ot nouvèl, Moris la komann troi gran sitèrn, 50000 lite shakin é pou kosa d’apré zot ? Pou vann lo gaz dann bannzil loséan indien. Donk La rényon ? Pétète, mé pa sir vi k’ bann pétrolyé-la, sa zanfan gaté la préféktir, pétète osi zanfan gaté gouvèrnman fransé.

Boudikont, si lo pri lo gaz i done di gaz, na désèrtin i gonf zot pla dsi nout do.

Justin


Kanalreunion.com