Oté

Lo PV pou trann-sink éro ? I rod tir ankor d’lo dann rosh ?

Justin / 12 mars 2013

Moin lé sir, zot la antann parlé sak banna i apèl "lo gran Paris". Sa in sistèm transpor pou dégaj la sirkilasion dan la kapital la Frans épi la banlié. I prétan dir, plan-la na tout kalité é sar bon pou dévlop l’ékonomi lo péi. Biensir, sa i kout ar pa arienk in kat-sou, épi dann sak toulmoun i apèl lo tan la kriz, lé pa fasil pou trouv lo l’arzan. Donk, in pé nana dan l’idé goumant bann z’amann i gingn kan i éstasione in mové l’androi. I prétan i vé fé pèy demoun trann-sink éro olèrk dis-èt i pèy koméla.

Zot va di, sa in bann parol dan l’èr vi k’la pankor désidé. Donk, fé pa la bou avan la plui ! Sof ké kan i lans in n’afèr konm sa dan l’opinion, sé pou tèst anou, é si i kriy pa pli for ké for, i aplik lo z’afèr. Par l’fèt, ousa i vé aplik z’afèr-la ? Dann Paris, dan la réjion pariziène, dan tout la Frans, d’apré sak i prétan. Mé konm Jacques Dutronc i pé di : é nou, é nou, é nou ? Nou, bann péi l’Outre-mèr. Sré in pé for k’i fé in zès konm sa avèk nou ! Pars nou la poin arien pou gagné dan in n’afèr konm sa, mèm pa in konféti d’dévlopman ékonomik. Konm di mon gran-mèr : kafé-la lé in pé for.

Sa i ramèn anou in pé an arièr. Zot i souvien l’afèr d’tram-trin ? Katro-vin pour san d’moun té pou sa La Rénion. Zot i an souvien la rant férovièr ? Dan tout réjion la Frans, i gingn sa pou bann trin réjional. Donk, na poin d’rézon pou nou té i gingn pa sa. Mi souvien bien nou lété tou sèl é bann sosialis la pa lèv lo pti doi. La droit la pil anou é gouvèrnman la fé konm si do riyin’été, mèm si té i mèt a mor in gran projé bien nésésèr. Zoué pa nou lo kou d’PV pou trann-sink éro pars lèr-la, sar riyink in manièr pou tir d’lo dann rosh, é sa i gingn pi fé zordi.

NB : Na arienk in ga i apèl Moïse la fé in l’ésploi konm sa kan li la ramèn bann Juif dan "la tèr sint". Li la bat èk in baton dsi in bèl rosh épi d’lo la koulé. Mé sa tété dann tan lontan, zordi, mi oi pa kisa i gingn ankor fé sa !

 Justin 


Kanalreunion.com