Oté

Lo rès, sé kozé pou pa la boush i pi !

Justin / 26 novanm 2009

Matante Zélida la ékrir Justin :
Mon shèr nové, mon spès salté... I prétan dir, in pé la ardéguène ankor z’ot ranguène déssi la kiltir... anfin, sak zot i apèl La Kultur : in bann réstan bann moun la vni pou pèp La Rényon… zot i konpran pa demoun lé ragoulé èk sa ? Pars, solon moin, na in sèl vré kultur La Rényon, sé la kultur fransèz... lo rèst lé fé aryink pou amiz la boush, pass lo tan pèrde son tan. Sof pou bann shèf, bann rouj-de-fon, pars zot i koné byin flate bann ba-z’instin, in gran kantité d’moun, an parlan z’ot kiltir, konmsa i gingn touzour ramas in kantité biltinn vote... Alé ! Pran sa pou toi !

Justin la fé pou répons :
Mon vyé matante k’i koz touzour la boush rouvèr... figuir aou, pou nou, tout kultur lé valab. Ni rofiz trouv inn lé pli méyèr ké l’ot, inn lé pli faye ké l’ote. Arzoute èk sa nout réspé pou nout z’ansète, toute nout z’ansète k’i sorte la Frans, Madégaskar, l’Inn, la Chine, péi Komor, Vietnam épi lé z’ot koté ankor… k’i fé k’nou nana in gran réspé pou z’ot kultur… é ké ni doi réspèk toute parèy. La pa bann réstan ditou, konm ou i di, pars avèk sak zot toute la améné, nou la nyabou fé in sivilizasyon é in kiltir orizinal, sète nout pèp rényoné avèk son pa-d’porte, la lang kréol. Lo rès out bann kozman i agarde aou, épi déssèrtin zournal la Droite, sé kozé pou pa la boush i pi.

Justin


Kanalreunion.com