Oté

Lo réspé, konm méyèr siman pou l’amityé

Justin / 22 zwiyé 2016

Moin na in kamarad i di amoin souvan défoi na poin arien lé valab konm in volaye la kour pou fé in bon kari. Li ardi ankor : lo tin la kour na poin méyèr ké sa ! Konm li di an aoir son salad épi son légime dann son zardin ala in n’afèr li èm. Konmsa li konpran la vi.

Mèm li lé mon kamarad moin té pankor alé son kaz é in zour lo l’okazyon la prézanté. L’èr-la moin la tonm de o pars moin té i suiv son kozman épi moin té i fé lo tablo son kaz avèk son kour. Son kour té pa ditou konm moin té i pans. Poitan l’avé la plas pou fé dé shoz dédan. Pétète pa tout lo komodité ké li téi rakont mé kant mèm l’avé do koi pou fèr.

Li la konm vi moin té in pé soz kan moin la vi son kour ranpli avèk zèrb, prop, bien razé konmsi lo pélouz i sort koifèr. L’até zoli, mi pé dir azot, mé té pa sak mi pansé… L’èr-la li la près éskiz ali èk moin é li la di, li na pi lo tan bien okip son kour. Bien okipé ? Pétète li té i pans sak li té i di amoin souvan dé foi... Poitan shakinn i okip son shé soi konm li gingn é kan ou i sava shé d’moun ou i sava an réspé. Sirtou la kaz in bon dalon, la kaz in bon kamarad.

Lo réspé, sanm pou moin, sé lo méyèr siman pou in bon l’amitié.

Nb Oté justin i fé pa la politik don zordi ? Zordi non pars zot i koné kan i ékri, out pansé i suiv lo mouvman out doi dsi lo klavyé. Out doi li mèm i suiv lo mouvman out pansé kan li l’apré navigé-dérivé. Sa i dépann l’èr, lo moman, lo rèv ou l’apré fé mèm révéyé, la prèv ou nyabou suiv out shomin la libèrté…


Kanalreunion.com