Oté

Lo réspé la parol doné, sa i figir pa dann lo vokabilèr prézidansyèl !

Justin / 26 out 2014

Zot i pé dir amoin koman in boug i fé in promès sèryé, an piblik, dann in kanpagn éléktoral nana solman dé z’ané épi dé z’ané apré li fé konmsi li la zamé promète arien. Li éskiz pa li, li di pa lé pa posib pars sosi ou sinonsa sola... Li lé pa la èk sa ! Ou lé mèm a d’mandé si lo boug sé lo mèm, si par égzanp in pé la pa lav son sèrvo, si par égzanp li lé pa dann in n’ot vi. An plis ké sa, lo boug lé sinik vèy pa koman. li fé lo joli dan la télé, lo kèr gronouy i kroas dann son lantouraj, désèrtin journalis péi i trouv li la promète in bonpé z’afèr pou La Rényon épi zot i afish sa an promyé paz siouplé. In gran l’afish bien prézanté, bien koloré.Konm di in kamarad Le Port, i diré, bann média lété anéstézyé !

Biensir, mi vé parl la vizit François Hollande. In vizit la bien kontant ali vi k’li la trouv la shalèr dan la manyèr l’akèy ali. Bon pou sa mèm !

Solman sak lé pli grav sé ké prézidan-la na poinn réspé pou la parol doné. Li la donn parol dann son diskour Sin-Loui épi li fé konmsi sa la pa inportan ditou. Pétète in pé sar kontan d’in n’afèr konmsa. Pétète zot va dir bann kominis la pran in boush ta gèl, Mèm pa troi minit apré ké son l’aviyon la poz Pierfon. Kosa li la di ? Li la di La Rénion la pa bézoin in program éspésyal, é i sifi d’ aplik lo mèm métod k’i aplik laba dan La Frans. La pa bézoin invant in plan pou La Rényon. Kontinyé konmsa, lé sir v’ariv in bon rézilta...Pou bann zéléksion i ariv ? Sansa pou lo dévlopman ? Dévlopman : sa la pa in mo i figir dann son vokabilèr. Ousa i lé l’otonomi dann l’énèrji... na pi. Ousa i lé l’otiosifizans alimantèr... na pi non pli. Ousa i lé lo tram-trin… pèrdi dann brouyar l’ané 2012. Mi vé pa parl lo rès pars sé konm k’i diré dann in n’ot vi, mèm dann in n’ot dimansion.

Dakor si lé konmsa ! Dakor si bann zéléktèr i arsign in shèk an blan pou li ! Mé si la pa signé, si li lé kandida, li pé atann ali in koréksion konm li la zamé gagné é tout sak i bate la min zordi, i pé atann azot, zot osi, k’i anvoy azot dingé...In shèf d’éta, san konplèks konmsa, li lé paré pou li trok langaz èk ninport ki. Bann patron k’i pran zot ti dézéné avèk li, tansion pangar sa i rès pri dann zot ti gozyé. Mi di sa konmsa, pou lo ka ou zot i koné pa kisa zot na a fèr. Yèr, zordi, konm domin, lo réspé la parol doné, sa i figir pa dann lo vokabilèr prézidansyè !

Justin

NB In pti mo pou la rout : In mo i rovien dann mon léspri sé lo « datura ». Sa in plant danzéré sa ! Si ou i gingn bien travay ali, li anéstézyé n’inport kisa. Li lé riskab andor n’inport de ki... I parétré désèrtin tizanèr i tiliz sa pou anéstézyé d’moun, kisoi an tizane, kisoi an poud, kisoi an mélanz avèk d’ot shoz, mé léfé lé garanti. Lo viktime i rann pa li kont de riyin.


Kanalreunion.com