Oté

Lo rèst, sé kouyonade é konpagni !

Justin / 17 désanm 2009

Matante Zélida la ékrir Justin :
Mon shèr nové, mon spès salté,
Dimansh dèrnyé, moin la pans aou. Moin la kalkil out kardyak té pa loin lévé kan ou la vi gran rényon la Droite la fé la-ba Sin-Pyèr. Té foulé, mi di aou. Eskiz, mé mi èm di z’afèr i fé soufèr bann rouj-de-fon. So foi issi, moin lé sir zot la soufèr, é zot la mazine galo zot i sava gagné. Oté ! Boug-la lé sinpa oui, épi zoli garson, épi byin kozan. Tandis ké zot... sof lo réspé moin nana pou l’moun, mi oi pa zot fé in pli dovan li… tok ! Pran sa pou toi !

Justin la fé pou répons :
Mon vyé matante k’i koz touzour la boush rouvèr, lé vré, lo pui la kouyonis lé o-fon, mé ou i profite ankor pou krèz in pti pé. La politik la pa in défilé manekin. Sé in konba rante bann z’idé, bann projé, bann politik i fo fé dan lo péi. Konm in saz noré di : « la pa bézoin alé gardé si lo kandida lé sinpa, si li na zoli linz, é la figuir plézab ». Sak i fo oir, sé si li vé amène in bon politik pou mète anou dann shomin dévlopman dirab, épi propoz l’imanité in légzanp réspéktyé lo klima, épi ankor byin travay avèk nout bann voizin. Lo rèst i ansèrv de riyin, sé kouyonade é konpagni.

Justin


Kanalreunion.com