Oté

Lo rézilta, sa i kont pa ! La kom, sé lo pin béni !

Justin / 14 mé 2013

M’a dir azot in n’afèr. Lé pa kroiyab, mé vré ! Moin té i pans, problèm rokin sa lété fine réglé. Touléka, moin té i pans, tout kalité mézir té fine ète pri pou in bon partaz la mèr rant demoun épi rokin. Ziska somenn dèrnyèr, kan in bodibordèr la trouv la mor dan la mèr sin-zil.

Donk, konm in bonpé d’moun, moin la dékouvèr lo problèm té pa réglé. Lannuiman, sé k’in moun la lès son vi la-dan !

Romark bien, lé pa fasil ète o kouran in problèm konm sa isi La Rényon, pars mi pans, désèrtin i pass zot tan fé la kom dsi la késtyon, é moin na konm linprésyon i sousyé pa rézoud lo problèm. Pou kosa mi di sa ? Pars, parmi tout bann partnèr lé angajé dan lo règloman, moin lé pa sir tout i kroi i pé trouv in solisyon dann problèm-la. A komansé par bann zélu Sin-Pol épi Sin-Lé. Sète Sin-Pol, sof mon réspé, sanm pou moin, i kontinyé mazine an misouk lé pli préférab demoun i rant pa dan lo, konmsa na poin okin danzé pou bann zélu. Zot i souvien pa madam Bello kosa té i di ? El té i di, la mèr lé danzéré é i fo bingn par isi lo Brizan é pa alé rod dézord par déyèr Brizan. Lo mèr Sin-Lé, son koté, i pans arienk in n’afèr, sé élimine bann rokin, par dizène, par santèn si i fo, san bien konète konm toulmoun konbien bébète konmsa nana.

Moin lé pliské sir, désèrtin la fine komans kalkil na poin solisyon pou problèm-la. La prèv ? In pé i rod déza anvoy lo patat sho pou lé zot.

Final de kont, zot i vé solman sov zot po, zot karyèr, zot lanbisyon. Pou sa zot i sousyé pa d’ékonomiz larzan piblik. Si la dépans i pé asir azot zot manda lo mèr. Madam Bello la kalkil té pli préférab anvoy lo patat sho ziska Matignon. Promyé minis na ka débarbot ali avèk sa. Pèrsone i konpran pa pou kosa èl i fé sa, mé sak lé sir, sé k’i pé kominiké la dsi, é la kom, sé lo pin béni désèrtin zélu.

Justin


Kanalreunion.com