Oté

Lo servis piblik lé an gouni !

Justin / 13 octob 2015

D’apré lo zournal la Rényon èk Rényon promiér, lo prézidan la rézyon èk lèks mèr sin pol i bwar ti lé an so moman. A koz don ? I di sondaz yèr i mèt a zot an fièv krapo. Madanm lèks mèr sin pol lé déza d’si lo palié prézidansièl i di. Lo prézidan la rézyon i tyinbo ankor la rout dovan lo tirbo i prétan. Tou lé mwa ziska mwa d’désanm lé prévi in sondaz. Pou kisa Rényon promiér i roul don ? Li, lo zournal li pé roul pou kisa li vé vik sé in zafèr an privé, mé Rényon promiér sé lo sérvis piblik Bayoun.

Li osi li roul pou lo tirbo Bélo èk nout loto é dovinn kisa i mèt lésans ? Mi rovyin d’si lo sondaz yèr. So kou si, zot i domann pi pou kisa i sar voté, i domann kisa ou souèt i sar èt éli konm si ou domann in moun kisa li wa konm vinkèr dann in léspor. La domann osi donn out pronostik d’si la viktwar lin a lot, konm ou donn out pronostik d’si la kours shoval. Tousala lé rorganizé èk nout rodovans télé, è knout larzan d’si la rodovans odiovisièl.

La rodovans odiovisièl, tout i koné, sé in taks ki fé pèy a nou pou bann gran group piblik odiovisièl, pou fé fonksyonn lo sérvis piblik télé-radio boudikont, o rotour lo sérvis piblik i dwa donn a nou zinformasyon d’si télé èk radio nasyonal é osi dann loutromèr. Pou mwin nout tout i dovré èt égal dovan lo servis piblik. Lo sérvis piblik i dwa awar vokasyon pou la kiltir, pou lédikasyon, pou in bon linformasyon. Lo servis piblik lé an gouni !


Kanalreunion.com