Oté

« Lo sien na son kamarad »

In kozman pou la rout

Justin / 12 mé 2016

Sa sé in drol provèrb pars souvan dé foi i pé oir lo shien apré trènn tousèl dann shomin… Pétète alor li sava oir son kamarad. La pa tousa mé kosa sa i vé dir ozis ? Bien sir sa lé raport la solitid. Mèm si dann in shanté i di pa la solitid sa i égzis pa !

L’èr-la kan in moun lé tousèl é ké son tèt i komans bloké afors li lé tousèl, domoun i di ali, alé rod in kamarad pou li pars mèm lo shien nana son kamarad. Dizon sa i mérite in réfléksyon pars nana vréman demoun lé tou sèl : kisoi l’izolman la viéyès osinonsa la maladi, kisoi pars son moun la kite ali. Final-de-kont la vi sé in suit bann sityasion i rosanm pa : in zour ou lé an parmi, in zour ou lé tou sèl.

Antansyon malèr lé kapab arivé : i di pa nana san-vin pèrsone i suisid shak ané é moin mi pans sa i ariv kant dann out syèl pèrsonèl na poin in sèl pti koin blé. Ni artrouv !


Kanalreunion.com