Oté

Lo sik amèr !

Justin / 26 zanvié 2016

Dousman, dousman pétèt pa san sokouss vi la konzonktir zénéral zordi, mé sanm pou mwin, nou la finn byin anbèk dan lo lané 2016. La fèt la fini, sak té parti an sanzman d’èr, kiswa dan lé o kiswa déor la finn rovni zot kaz, travayèr la lèv travay dopi lo 18, pou sak néna travay, travayèr batiman, mi vé dir, zédi la rantré éskolèr pou bann zamontrèr, konm i di lo péi i ropran son laktivité normal.

Zordi shakinn i fé son prédikasyon d’si lo lané 2016 zistoman. I sra konm 2015 ? pli pir, ousinonsa mwin pir ? Yèr lo préfé la pran la parol, é dann son prédikasyon li minm li la di, lo péi an li minm i dwa pa atann in tro bon laméliorasyon pou 2016. Vidaman li la pa tir kart pou sa, mé konm sé li lo roprézantan léta la Rényon, lo éspésialis léta boudikont, ki mié k’li, i pé donn a nou inn ti lékléraz d’si sak i sar fé domin.

Dapré son dir, néna solman inn ti léklérsi dan nout sièl, nout PIB la goumant 3 pour san pou 2015, vi lo dékalaz, néna pou zoué ankor, sinonsa, pou 2016 dan ninport lakèl dominn, lékonomi lanplwa, li wa pa tro in gran sanzman par rapor 2015. Lozman, li minm li rokoné i mank, la fé inn dé an 2015 mé la pa sifizan, fo fé plis kan 2015, sirtou la kaz pou maléré. Lagrikiltir, sirtou pou kann, pou 2017 kont pi si lo kota sikrié, sé lo préfé ki di, alorss ! 2017 nout sik i dovwin amèr !


Kanalreunion.com