Oté

Lo suisid avèk lo tantativ, in gran problèm santé piblik, isi La Rényon

Justin / 20 séptanm 2016

Mi sort lir dsi Imaz press Reunion, la-ba, Sint-Roz demoun i sort trouv lo kor in jenn-fiy i apèl Charlotte Jouque. Dopi près in somenn té apré rod aèl partou, mé téi trouv pa ziska dann la nuite dimansh-lindi, la fini par trouv son kor dann in l’androi la-ba i apèl La Ravine glisant.

Mi sort parl lo suisid in démoizèl é moin lé sir in pé lé kapab kroir sa sé in tablatir k’ i atak an mazorité bann mamzèl avèk bann madam. Poitan lé pa vré, i paré katrovin pour san bann tantativ i vien par bann bononm, sak i apèl lo sèks for. Dsi sink tantativ, néna in fiy (sansa in madam) épi kat garson (sansa bononm). Donk lo sèks di for, li lé pa épargné par so maladi-la isi dann nout péi, an kontrèr.

La Rényon nana in gro problèm santé piblik dsi la késtyonn suisid : inn tou lé troi zour é sa sé in n’afèr k’i mète nout sosyété dann l’akizasyon. Pars in suisidé, sé in viktime. Pou kosa ? Pars, momandoné li la pa trouv in d’ot solisyon ké pass a l’akt. Tro shagriné, tro abandoné, tro tousèl dann in sityasion li pé pi fèr-fas. Nout péi lé pa si solider ké lo moun I di. Nout sosyé té la pa osi ini ké nout tout i vé bien kroir.

Isi, i parl bonpé bann z’aksidan la rout. I parl bonpé bann vyolans fizik, bann krime, dann déli. I parl pa tro bann suisid épi bann tantativ. Poitan sa osi fé parti la vyolans pars sète-la sé la vyolans ké lo bann viktime i rotourn kont zot mèm. In gran problèm santé piblik an vérité !


Kanalreunion.com